ڕۆژی چوارشەممە، ڕێكەوتی 15ـی کانوونی دووەمی 2025، وەزارەتی خوێندنی باڵا و توێژینەوەی زانستی، لە ڕاگەیەندراوێکدا ئاماژەی بەوە دا، سەرۆکایەتی ئەنجوومەنی وەزیرانی هەرێمی کوردستان-عێراق، ڕەزامەندی دا لەسەر داواکاری قوتابییانی خوێندنی باڵا، ماستەر و دکتۆرا کە وانەبێژن و فەرمانی بە گرێبەستبوونیان هەیە.
وەزارەتەکە ئەوەشی خستەڕوو، ئەنجوومەنی وەزیران دڵنیایی داوە، لەوەی قوتابییانی خوێندنی باڵا مافیان پارێزراو دەبێت و لە خوێندن بەردەوام دەبن تا کاتی تەواوکردنی پرۆسەکە.
وەزارەتی خوێندنی باڵا ئاماژەی بەوە دا، قوتابییانی خوێندنی باڵا دوای تەواوکردنی خوێندنەکەیان ڕێکارەکانی بە گرێبەستکردن و دەستبەکاربوونیان بۆ ئەنجام دەدرێت، بەو مەرجەی بە کردارەکی وانەبێژبووبن و مەرجەکانی دامەزراندن بە گرێبەستیان تێیدا بێت، واتە لە یەک کاتدا هەردوو مافى خوێندن و دامەزراندنیان پارێزراو دەبێت.
