نزار ئامێدی، سەرۆک کۆماری عێراق، بەبۆنەی دەستبەکاربوونی لە پۆستەکەیدا پەیامێکی پیرۆزبایی لە شا چارڵزی سێیەمی بەریتانیاوە پێگەیشت. لە ڕاگەیەندراوێکی سەرۆکایەتی کۆماری عێراقدا هاتووە، شا چارڵز لەو پەیامەی کە بۆ سەرۆک کۆمار ئامێدی ناردووە، ئاماژەی بەوە کردووە کە گرنگییەکی زۆر بە پەیوەندییەکانی لەگەڵ عێراق دەدات.
شا چارڵز لە پەیامەکەیدا سەرنجی بۆ پێداگری لەسەر زیاتر بەهێزکردنی بەندەکانی دۆستایەتی نێوان هەردوو وڵات و گەلەکانیان ڕاکێشا، و خۆشحاڵی خۆی نیشاندا بەرامبەر بەو پێشکەوتنە ئەرێنییانەی عێراق لە ساڵانی ڕابردوودا بەدەستی هێناون، بەتایبەتی لە بواری بەهێزکردنی ئاسایشدا.
شای بەریتانیا هیوای خواست کە کارکردنی هاوبەش بەردەوام بێت بەمەبەستی پاراستنی ئەو دەستکەوتانەی لە عێراقدا بە قوربانیدانێکی گەورە بەدەست هاتوون، و چەسپاندنی سەقامگیری بۆ گەلی عێراق و ناوچەکەش بە هەمان شێوە.
شا چارڵز ئاماژەی بە هاوکارییە نزیکەکانی نێوان هەردوو وڵاتیش کرد و خۆشحاڵی خۆی نیشاندا بەو کارە هاوبەشانەی لە بوارەکانی بەرەنگاربوونەوەی کاریگەرییەکانی گۆڕانی کەشوهەوا و ئاسایشی ئاودا ئەنجام دەدرێن، و جەختی لەسەر پێویستی بنیاتنانی داهاتوویەکی ئارامتر و گەشاوەتر بۆ عێراق و شانشینی یەکگرتوو کردەوە.
