پەیمانگای ئاماری تورکیا، ئەمڕۆ شەممە، ڕایگەیاند کە فرۆشتنی خانوو لە وڵاتەکەدا لە ماوەی مانگی نیسانی ڕابردوودا زیادی کردووە، ئاماژەی بەوەش کردووە کە هاووڵاتیانی عێراقی لە پلەی پێنجەمی ئەو ڕەگەزنامە بیانیانەدا هاتوون کە زۆرترین خانووبەرەیان لە تورکیا کڕیوە.
پەیمانگاکە لە ڕاپۆرتی مانگانەی خۆیدا تایبەت بە ئامارەکانی خانووبەرە، چاوی لێکردووە، ئاماژەی بەوە کردووە کە “کۆی گشتیی فرۆشتنی خانوو لە تورکیا لە ماوەی مانگی نیساندا گەیشتووەتە ١٢٦ هەزار و ٨٠٨ خانوو، بە زیادبوونێکی ٢.٦٪ بەراورد بە هەمان مانگی ساڵی ڕابردوو”.
ڕاپۆرتەکە زیادیشی کردووە کە “فرۆشتنی خانووی نوێ بە ڕێژەی ٩.٦٪ زیادی کردووە و گەیشتووەتە ٤٠ هەزار و ٣٠٦ خانوو، لە کاتێکدا فرۆشتنی خانووە بەکارهاتووەکان بە ڕێژەی ٠.٣٪ کەمی کردووە و ٨٦ هەزار و ٥٠٢ خانووی تۆمارکردووە”.
هەروەها ئاماژەی بەوەش کردووە کە “فرۆشتنی خانوو بە بیانییەکان لە مانگی ڕابردوودا بە ڕێژەی ١.١٪ بەراورد بە هەمان مانگی ساڵی پێشوو کەمی کردووە و گەیشتووەتە ١٥١٦ خانوو، کە ڕێژەی ١.٢٪ی کۆی گشتیی فرۆشتنە گشتییەکان پێکدەهێنێت”.
بەگوێرەی پەیمانگا تورکییەکە، “ڕووسەکان لە پێشەنگی لیستی ئەو ڕەگەزنامانەدا هاتوون کە زۆرترین خانووبەرەیان لە تورکیا لە ماوەی مانگی نیساندا کڕیوە بە ٢٦٣ خانوو، لە دوای ئەوانیش چین بە ١١٠ خانوو، پاشان ئێران بە ١٠٠ خانوو، و شانشینی یەکگرتوو بە ٩٨ خانوو، لە کاتێکدا عێراق بە ٩٥ خانوو لە پلەی پێنجەمدا هاتووە”.
لە کۆتایی ڕاپۆرتەکەدا سەرنج بۆ ئەوە ڕاکێشراوە کە “فرۆشتنی خانوو بە بیانییەکان لە ماوەی چوار مانگی یەکەمی ئەمساڵدا بە ڕێژەی ١١.٦٪ بەراورد بە هەمان ماوەی ساڵی ڕابردوو کەمی کردووە و گەیشتووەتە ٥٦٨١ خانوو”.
