ئاڵپئارسڵان بایراکتار، وەزیری وزە و سامانە سرووشتییەکانی تورکیا لە رێگەی فڕۆکەخانەی نێودەوڵەتی هەولێر گەیشتە شاری هەولێر.
بایراکتار لە لایەن کەمال محەممەد، وەزیری سامانە سرووشتییەکانی حکومەتی هەرێمی کوردستان بەوەکالەت و ئومێد خۆشناو، پارێزگاری هەولێرەوە پێشوازی لێکرا.
بڕیارە بایراکتار بەشداری لە کۆبوونەوەی مەسرور بارزانی، سەرۆکی حکومەتی هەرێمی کوردستان و هاکان فیدان، وەزیری دەرەوەی تورکیا بکات.
ئەم سەردانە لە کاتێکدایە 22ـی ئابی 2023 حەیان عەبدولغەنی جێگری سەرۆك وەزیرانی عێراق بۆ كاروباری وزە و وەزیری نەوتی عێراق لە ئەنقەرە لەگەڵ ئالب ئەرسەلان بەیرقدار وەزیری وزە و سامانە سروشتییەكانی توركیا كۆبووەوە.
هەردوو وەزیری نەوتی عێراق و وەزیری وزە و سامانە سروشتیەكانی توركیا لەدیدارەكەیاندا تاوتوێی كۆمەڵێك بابەتی دووقۆڵی و ناوچەیی بەرژەوەندی هاوبەشیان كردووە.
جەختیشیان لە گرنگی هێڵی بۆری نەوتی خاو لە نێوان عێراق و توركیا و دەستپێكردنەوەی ڕۆیشتنی نەوتی خاو كردەوە دوای تەواوبوونی كارە پێویستەكانی نۆژەنكردنەوە و پشكنین، لە دوای ڕووداوی بومەلەرزەكەی مانگی شوباتی ئەمساڵ.
ئاماژە بەوەش درابوو لیژنەی هاوبەشی ئابووریی عێراق و توركیا كە هەردوو وەزیر سەرۆكایەتی دەكەن، بڕیاریانداوە كۆبوونەوەی 19ەمینی لیژنەكە لە بەغداد ئەنجامبدرێت و دواتریش وادەیەك بۆ ئەو كۆبونەوەیە دیاری بكرێت.
