لیژنەی بینینی مانگ یەکەم ڕۆژی جەژنی رەمەزان دیاری دەکات

1

لایک

0

وەزارەتی ئەوقاف و کاروباری ئایینیی حکوومەتی هەرێمی کوردستان-عێراق داوا لە دەزگاکانی ڕاگەیاندن دەکات بۆ دیاریکردنی یەکەم رۆژی جەژنی رەمەزان پەلە نەکەن و چاوەڕێی بڕیاری فەرمی بن.

نەبەز ئیسماعیل، وتەبێژی وەزارەتی ئەوقاف و کاروباری ئایینی، لە نووسراوێکدا بۆ دەزگاکانی راگەیاندن رایگەیاند، ئەمڕۆ چوارشەممە، ١٨ـی ئاداری ٢٠٢٦، لیژنەی باڵای بینینی مانگ لە وەزارەتەکەیان بە مەبەستی دیاریکردنی یەکەم رۆژی جەژنی رەمەزان کۆدەبێتەوە.

لە نووسراوەکەدا ئاماژەی بەوە کردووە، داوا لە دەزگاکانی راگەیاندن دەکەن بۆ رێزگرتن لە بڕیارەکانی حکوومەتی هەرێمی کوردستان و پاراستنی پیشەی رۆژنامەوانی تاوەکو بە فەرمی راگەیەنراوی وەزارەت بڵاو دەبێتەوە پشت بە هیچ سەرچاوە و دەنگۆیەک نەبەستن و باسی دیاریکردنی یەکەم رۆژی جەژن لە هەرێمی کوردستان نەکەن.

ساڵانە لە کۆتایی مانگی رەمەزاندا لیژنەی باڵای بینینی مانگ لە وەزارەتی ئەوقاف و کاروباری ئایینی بە هەماهەنگی لەگەڵ لیژنە لاوەکییەکان لە پارێزگا و ئیدارە سەربەخۆکانی هەرێمی کوردستان بۆ چاودێریکردنی مانگ کۆدەبنەوە. 

دیاریکردنی یەکەم رۆژی جەژن بە پشتبەستن بە بەڵگەی شەرعی و بینینی مانگ بە چاو یان ئامێری پێشکەوتوو دەکرێت.