لە جەژنی قورباندا زیاتر لە هەزار و ٨٠٠ کەس لە عێراق بریندار بوونە

0

لایک

0

وەزارەتی تەندروستیی عێراق ئاماری بریندارانی ڕۆژانی جەژنی قوربانی لە سەرجەم پارێزگاکان بڵاوکردەوە و رایگەیاند، لەو ماوەیەدا هەزار و ٨٧٦ کەس بەهۆکاری جیاواز بریندار بوون یان ڕەوانەی نەخۆشخانەکان کراون.

سەیف بەدر، وتەبێژی وەزارەتی تەندروستیی عێراق، ڕۆژی شەممە، ٢١ی ئایاری ٢٠٢٦، لە راگەیەندراوێکدا وتی، ئامارە فەرمییەکان کە لەلایەن بەڕێوەبەرایەتیی ئۆپەراسیۆنەکان و خزمەتگوزارییە پزیشکییە فریاکەوتنەکانەوە کۆکراونەتەوە، دەری دەخەن کۆی گشتیی بریندارەکان گەیشتووەتە هەزار و ٨٧٦.

بەگوێرەی ئامارەکە، زۆربەی بریندارەکان بەهۆی ڕووداوەکانی هاتووچۆوە بوون کە هەزار و ٣٢٤ بوون، ١٢٠ ژەهراویبوون، ١٢٢ تەنگەنەفەسی، ١٦٩ سووتان، ٥٥ برینداربوون بە گولــلە، ٢٨ برینداربوون بە یاریی ئاگرینی منداڵان و ١٨ خنکان.

وتەبێژی وەزارەتی تەندروستیی عێراق راشیگەیاندووە، پێش جەژن عەبدولحوسێن مووسەوی، وەزیری تەندروستی، فەرمانی کردبوو بە ئامادەیی تەواوی تیمە پزیشکییەکان و چاودێریی وردی کارەکانیان لە پارێزگاکان، هەروەها جەخت کرابووەوە لەسەر خێراکردنی وەڵامدانەوەی تیمەکان و دابینکردنی هەموو جۆرە دەرمان و پێداویستییەکی پزیشکی بۆ ئەوەی باشترین خزمەتگوزاری پێشکێشی بریندارەکان بکرێت.

وەزارەتی تەندروستیی عێراق راشیگەیاند، تیمە پزیشکییەکان لە ڕۆژانی جەژندا بەدرێژایی ٢٤ کاتژمێر لە چوارچێوەی پلانی فریاکەوتندا لە کاردابوون.