مەحمەد سەمعان ئاغا، پارێزگاری کەرکووک لە بەغداد لەگەڵ محەمەد شیاع سوودانی، سەرۆکوەزیرانی عێراق کۆبووەوە.
بەگوێرەی ڕاگەیەندراوێکی ماڵپەڕی فەرمی پارێزگای کەرکووک، سەرۆکوەزیران سوودانی پیرۆزبایی لە مەحمەد سەمعان ئاغا پارێزگاری نوێی کەرکووک کرد بەبۆنەی بەدەستهێنانی متمانەی ئەنجومەنی پارێزگا و هیوای سەرکەوتنی بۆ خواست لە ئەرکەکانی داهاتوودا.
لە ڕاگەیەندراوەکەدا ئاماژە بەوە کراوە، لە کۆبوونەوەکەدا باس لە بارودۆخی گشتی کەرکووک کرا و پلان و جێبەجێکردنەکانی هەڵسەنگێندرا بە ئامانجی پەرەپێدانی کەرتی خزمەتگوزاری لەسەرجەم قەزا و ناحیەکانی پارێزگاکە. لەو چوارچێوەیەدا ئامانج ئەوە بوو کە لە ڕێگەی بەرزکردنەوەی ئاستی خزمەتگوزارییە گشتییەکان و پاراستنی بەرژەوەندییەکانی هەموو لایەنە پەیوەندیدارەکانەوە بەشداری لە سەقامگیری پارێزگاکەدا بکرێت.
سەرۆکوەزیران سوودانی جەختی لە پابەندبوونی حکوومەت کردەوە بە پاڵپشتیکردنی ئیدارە ناوخۆییەکان و ئەنجومەنی پارێزگاکان، ئاماژەی بەوەشکرد کە پشتیوانی بەردەوام دەبێت بۆ جێبەجێکردنی پڕۆژەکانی خزمەتگوزاری و گەشەپێدان و باشترکردنی دۆخی ئابووری پارێزگاکە و دەستەبەرکردنی گەشەپێدانی گشتی.
پارێزگار محەمەد سەمعان ئاغا لە هەژماری خۆی لە تۆڕی کۆمەڵایەتی فەیسبووک سەبارەت بە کۆبوونەوەکە ڕاگەیەندراوێکی بڵاوکردەوە و دەڵێت:
“لە کۆبوونەوەکەدا باس لە دۆخی کەرکووک و ڕێگاکانی پاڵپشتیکردنی ئیدارەی خۆجێی کرا، ئەم کۆبوونەوەیە یەکەم کۆبوونەوەی ئاغا بوو لە دوای وەرگرتنی پۆستەکەی”.
نزار ئامێدی سەرۆککۆماری عێراق فەرمانی دەستنیشانکردنی مەحمەد سەمعان ئاغا، سەرۆکی بەرەی تورکمانی عێراقی وەک پارێزگاری پارێزگای کەرکووک ڕادەست کردبوو.
