سبەی چوارشەممە شی جینپینگ، سەرۆکی چین بە سەردانێکی دوو رۆژە دەگاتە سعودیە و بەشداری لە لووتکەی چین-سعودیە، چین-کەنداو و چین-وڵاتانی عەرەبی دەکات، کە تیایدا دۆسیەی ئابووری و ئاشتی لە ئاستی ناوچەکە تاوتوێ دەکرێن.
ئاژانسی هەواڵی سعودیە (واس)، ئەمڕۆ لە راگەیەنراوێکدا بڵاویکردەوە، سەردانەکەی شی جینپینگ، سەرۆکی چین لەسەر بانگهێشتی سەلمان بن عەبدولعەزیز، شای سعودیە بووە و ماوەی دوو رۆژ (لە 7 تاکو 9ـی ئەم مانگە) دەخایەنێت.
ئەوەش خراوەتەڕوو، لە سەردانەکەیدا سەرۆکی چین ئامادەی کۆبوونەوەی لووتکەی چین-سعودیە دەبێت کە سەلمان بن عەبدولعەزیز، شای سعودیە و محەمەد بن سەلمان، شازادی جێنشینی ئەو وڵاتە تیایدا ئامادە دەبن.
هەروەها سەرۆکی چین بەشداری لە کۆبوونەوەی لووتکەی ریاز دەکات کە بە بەشداری سەرکردەکانی کەنداو بەڕێوەدەچێت و بە لووتکەی چین-کەنداو ناو دەبرێت بۆ گەشەپێدانی پەیوەندییەکان.
ئاژانسی هەواڵی سعودیە ئەوەش ئاشکرادەکات، سێیەمین کۆبوونەوەی لووتکە کە لەو رۆژەدا لە سعودیە ئەنجام دەدرێت، بریتییە لە کۆبوونەوەی لووتکەی سەرۆکی چین و وڵاتانی عەرەبی بۆ هەماهەنگی و گەشەپێدان.
لەم کاتەشدا وڵاتانی عەرەبی ئامادەکاری دەکەن بۆ کۆبوونەوەی لووتکەی عەرەبی و چین کە تیایدا دۆسیەی ئابووری و ئاشتی لە ئاستی ناوچەکە تاوتوێ دەکرێن، کۆبوونەوەکەش لەکاتێکدایە کە شەڕی رووسیا و ئۆکرانیا ماوەی نزیکەی نۆ مانگە بەردەوامە و ئەوەش کاریگەری لەسەر ئاسایش و وزەی جیهانی دروستکردووە.
