پارێزگاری دهۆك داوا لە پەکەکە دەکات شارەکە چۆڵ بکات

0

لایک

0

عەلی تەتەر، پارێزگاری دهۆك ڕایگەیاند، بەهۆی شەڕەكانی ڕێکخراوی تیرۆریستی پەکەکە و توركیا  نزیکەی 30%ی گوندەکانی پارێزگاکە وێران کراون و چۆڵکراون، بۆیە داوای لە  لە چەکدارانی پەکەکە دەكەن ئەو گوند و شاخانەی چۆڵ بکەن بۆ ئەوەی دانیشتوان بتوانن بگەڕێنەوە سەر ماڵ و حاڵی خۆیان و دەست بە ژیانی ئاسایی خۆیان بکەنەوە.

عەلی تەتەر، پارێزگاری دهۆک ئەمڕۆ پێنجشەممە لە کۆنگرەیەکی ڕۆژنامەوانیدا ڕایگەیاند، “بەهۆی ململانێی چەکداریی نێوان ڕێکخراوی تیرۆریستی پەکەکە و سوپای تورکیا،  پارێزگای دهۆک زۆرترین زیانی بەرکەوتووە و نزیکەی 30%ی گوندەکانی پارێزگاکە وێران کراون و بەتەواوی چۆڵکراون، هۆی سەرەکی نەگەڕانەوەی دانیشتوانیش بۆ ناوچەکانیان سیاسەتەکانی ڕێکخراوی تیرۆریستی پەکەکەیە”.

ئاماژەی بەوەشكرد، داوا لە ڕێکخراوی تیرۆریستی پەکەکە دەكەین ئەو گوند و شاخانەی کە ئێستا تێیدا جێگیرن، چۆڵی بکەن بۆ ئەوەی دانیشتوانەكەی بگەڕێنەوە سەر ماڵ و حاڵی خۆیان و دەست بە ژیانی ئاسایی خۆیان بکەنەوە. 

پارێزگاری دهۆك باسی لەوەشكرد، حکومەتی هەرێمی کوردستان-عێراق لە ئێستاوە دەستی کردووە بە جێبەجێکردنی ژمارەیەك پڕۆژەی ئاوەدانکردنەوە لەو ناوچانەی كە زیانیان بەرکەوتووە، لەوانەش قیرتاوکردنی ڕێگای گەلیی باڵندە کە بەرەو ناوچەکانی نێروە و ڕێکان دەڕوات، جگە لە تەواوکردنی ئەو پڕۆژانە کە دەکەونە بناری چیای گارە و چیای مەتین.