نێچیرڤان بارزانی: خاکی هەرێم نابێتە هەڕەشە بۆ سەر ئێران و دراوسێکان

0

لایک

0

نێچیرڤان بارزانی جەختی لەوە کردەوە کە خاکی هەرێمی کوردستان-عێراق نابێتە هەڕەشە بۆ سەر ئێران و دراوسێکان، هاوکات داوای لە حکوومەتی عێراق کرد سنوورێک بۆ هێرشی گرووپە لەیاسادەرچووەکان دابنێت.

ئەمڕۆ سێشەممە ١٠ـی ئاداری ٢٠٢٦، بە سەرپەرشتیی نێچیرڤان بارزانی، سەرۆکی هەرێمی کوردستان-عێراق و فەرماندەی گشتیی هێزەکانی پێشمەرگە، کۆبوونەوەیەکی باڵای سەربازی و ئەمنی لە هەولێر (ئەربیل) بەڕێوەچوو. لە کۆبوونەوەکەدا هەڵسەنگاندن بۆ مەترسییەکانی شەڕی ناوچەکە کرا و چەندین بڕیاری نوێی ئەمنی دەرکران.

بەپێی راگەیەنراوێکی سەرۆکایەتیی هەرێمی کوردستان-عێراق، کۆبوونەوەکە بە ئامادەبوونی شێخ جەعفەر شێخ مستەفا، جێگری سەرۆک، وەزیرانی پێشمەرگە و ناوخۆ، سوپاسالار و فەرماندە باڵاکانی پێشمەرگە بەڕێوەچووە.

وەک ئەوەی لە ڕاگەیەنراوەکەدا هاتووە، لە کۆبوونەوەکەدا بە وردی تیشک خراوەتە سەر لێکەوتەکانی شەڕ و پەرەسەندنە ئەمنییەکانی ناوچەکە. هەر لەو چوارچێوەیەدا، چەندین بڕیار و ڕێنمایی بۆ پاراستنی ئاسایشی هەرێم و چۆنیەتیی مامەڵەی دەزگاکانی راگەیاندن لەگەڵ ڕووداوەکان دەرکراون.

لە بەشێکی کۆبوونەوەکەدا، نێچیرڤان بارزانی هەڵوێستی فەرمیی هەرێمی کوردستان-عێراقی دووپات کردەوە و رایگەیاند “هەرێمی کوردستان بە هیچ شێوەیەک نابێتە بەشێک لە شەڕ و ململانێکان و پاراستنی ئارامیی وڵات لە ئەولەوییەتدایە”.

 سەرۆکی هەرێمی کوردستان-عێراق هۆشداریشی دا “بە هیچ شێوەیەک رێگە نادرێت خاکی هەرێمی کوردستان ببێتە سەرچاوەی هەڕەشە و مەترسی بۆ سەر کۆماری ئیسلامیی ئێران یان هەر وڵاتێکی دیکەی دراوسێ.”

سەبارەت بە هێرشە ناوخۆییەکانیش، کۆبوونەوەکە بە توندی سەرکۆنەی ئەو پەلامارە درۆنی و مووشەکییانەی کرد کە لەلایەن “گرووپە لەیاسادەرچووەکانی عێراقەوە” دەکرێنە سەر هەرێمی کوردستان-عێراق و زیانی گیانی و مادییان لێکەوتووەتەوە.

سەرۆکایەتیی هەرێم لەم بارەیەوە پەیامێکی ئاراستەی بەغداد کرد و رایگەیاند: “حکوومەتی فیدراڵیی عێراق بەرپرسیارە لەوەی ئەرکی خۆی جێبەجێ بکات بۆ رێگریکردن لەو هێرشانە و دۆزینەوە و سزادانی ئەنجامدەرانی، چونکە ئەم پەلامارانە پێشێلکارییەکی روونی سەروەریی وڵاتن و هەڕەشەن بۆ سەر سەقامگیریی گشتی.”