وەزارەتی ناوخۆ لەبارەی هەڵگرتنی چەکی بێ مۆڵەت هاووڵاتییان ئاگادار دەکاتەوە
  • TEBA KURDİ
  • عێراق
  • وەزارەتی ناوخۆ لەبارەی هەڵگرتنی چەکی بێ مۆڵەت هاووڵاتییان ئاگادار دەکاتەوە

وەزارەتی ناوخۆ لەبارەی هەڵگرتنی چەکی بێ مۆڵەت هاووڵاتییان ئاگادار دەکاتەوە

ته‌مموز 30, 2023 17:21
وەزارەتی ناوخۆ لەبارەی هەڵگرتنی چەکی بێ مۆڵەت هاووڵاتییان ئاگادار دەکاتەوە
0

لایک

وەزارەتی ناوخۆی حکومەتی هەرێم رایگەیاند، لە 22ی تەموزی 2023، یاسای چەک ژمارە 2ی ساڵی 2022 کەوتوەتە بواری جێبەجێ کردنەوەو ئەو هاووڵاتیانەی هێشتا چەکی تۆمار نەکراویان لە ماڵەکانیان هەیە و مەبەستیانە ئەو چەکە بکەنە فەرمی و خۆیان لە لێپرسینەوەی یاسایی بپارێزن، دوو مانگ مۆڵەت بۆ هاووڵاتیان هەیە کە خۆیان هەواڵ بدەن لە هەبونی چەکی بێ مۆڵەت و داوای مۆڵەت بکەن تا لە سزا ببوردرێن.

وەزارەتی ناوخۆی حکومەتی هەرێم لە راگەیەندراوێکدا لەبارەی چەکی بێمۆڵەت، رایگەیاند، دوای ئەوەی لە ماوەی ساڵی ڕابردو، لە رێی کردنەوەی 90 بنکەی تۆمارکردنی چەکی ئاگرینەوە، بنکەکانی پۆلیس زیاتر لە 17 هەزار چەکی هاوڵاتیانیان تۆمار کردوە و پسپوڵەی تۆماریان بە هاوڵاتی داوە، لە 22ی تەموزی 2023، یاسای چەک ژمارە 2ی ساڵی 2022 کەوتوەتە بواری جێبەجێ کردنەوە.

ئاماژەی بەوەشکردووە، بۆ ئەو هاوڵاتیانەی هێشتا چەکی تۆمار نەکراویان لە ماڵەکانیان هەیە و مەبەستیانە ئەو چەکە بکەنە فەرمی و خۆیان لە لێپرسینەوەی یاسایی بپارێزن، بە گوێرەی ماددەی 12، بڕگەی یەکەم لە یاسای چەک ژمارە 2ی ساڵی 2022، لە دوای بەرکاربونی یاسای چەک، دو مانگ مۆڵەت بۆ هاوڵاتیان هەیە کە خۆیان هەواڵ بدەن لە هەبونی چەکی بێ مۆڵەت و داوای مۆڵەت بکەن تا لە سزا ببوردرێن.

وەزارەتی ناوخۆ دەڵێت، لە دەقی بڕگەی یەکەم لە ماددەی 12ی یاسای چەک هاتوە، “هەرکەسێک لە ماوەی (60) ڕۆژ لە دوای بەرکاربونی ئەم یاسایە، هەواڵ بدات لەسەر دەستداریی چەکێکی بێ مۆڵەت، لە سزا دەبوردرێت و دەسەڵاتی مۆڵەتدان دەتوانێت بە پێی حوکمەکانی ئەم یاسایە مۆڵەتی پێبدات”.

ئەوەشی خستوەتەڕوو، لە ئێستادا هاوڵاتیان، ئەوانەی چەکەکانیان تۆمار نەکردوە و مۆڵەتی دەستداری یان هەڵگرتنی چەکیان نیە، دەتوانن سەردانی بەڕێوەبەرایەتی کاروباری ناوخۆ لە دیوانی پارێزگاکانی هەرێمی کوردستان (هەولێر، سلێمانی، دهۆک و هەڵەبجە) یان لە دیوانی ئیدارە سەربەخۆکانی (گەرمیان، ڕاپەڕین، سۆران یان زاخۆ) بکەن و داوای مۆڵەت بکەن بۆ دەستداری یان بۆ هەڵگرتنی چەک بۆ ئەوەی سوود لەو دەرفەتە وەربگرن.

لە راگەیەندراوەکەدا ئەوەش هاتوە، لەگەڵ پێشکەشکردنی داواکاری وەرگرتنی مۆڵەتی دەستداری یان مۆڵەتی چەک هەڵگرتن، تا وەڵامی داواکارییەکەی دەگرێتەوە، چەکەکەی وەکو چەکێکی ناسراو دەناسرێت و مامەڵەی چەکی قاچاغی لەگەڵ ناکرێت.

وەزارەتی ناوخۆ دەڵێت، “بە گوێرەی ماددەی 4 بڕگەی یەکەم لە یاسای چەک ژمارە 2ی ساڵی 2022، هاوڵاتیان دەتوانن بۆ دوجۆر مۆڵەت داواکاری پێشکەش بکەن، یەکەم: مۆڵەتی دەستداریی چەکی ئاگرین و تفاقی: واتا ئەو هاوڵاتیە داوا دەکات کە مۆڵەت وەرگرێت چەکێکی ئاگرینی هەبێت لە ماڵەوە (کلاشینکۆف یان دەمانچە یان هەردوکی) و مۆڵەتەکەی بە گوێرەی یاسای چەک بۆ ماوەی دوو ساڵ دەبێت، ئەم مۆڵەتە تەنیا بۆ هەبونی چەکە بە شێوەی یاسایی لە ماڵەوە و مافی ئەوە نادات بە هاوڵاتی تا چەکەکە هەڵبگرێت و بیهێنێتە دەرەوە”.

روونیشیکراوەتەوە، “مۆڵەتی هەڵگرتنی چەکی ئاگرین و تفاقی: ئەم مۆڵەتە بۆ هەبون و هەڵگرتنی چەکە و بۆ یەک ساڵ سوودی لێ وەردەگیرێ و دەکرێت نوێ بکرێتەوە”.

وەزارەتی ناوخۆی هەرێم داوا لە هاووڵاتیانی دەکات کە سوود لەو 60 رۆژە وەربگرن و ئەوانەی چەکەکانیان تۆمار نەکردوە، دەتوانن سەردانی ئەو بەڕێوەبەرایەتیانەی لە سەرەوە ناویان هاتوە بکەن، بۆ ئەوەی بە فەرمی داوای مۆڵەتی دەستداری یان هەڵگرتنی چەک بکەن.

هەروەها داوا لە هاووڵاتیان دەکات کە خۆیان لە هەڵگرتنی چەکی بێ مۆڵەت بپارێزن چونکە دەسەڵات دراوەتە پۆلیس و ئاسایش و هێزە ئەمنییەکانی دیکە کە لە هەبونی زانیاری دەربارەی چەکی بێ مۆڵەت، ڕێوشوێنی پێویست بگرنە بەر و لەگەڵ دەستبەسەر کردنی هەر پارچە چەکێکی بێ مۆڵەت، هەڵگرەکەی بەگوێرەی ماددەی 15 لە یاسای چەک ژمارە 2ی ساڵی 2022 دەدرێتە دادگا و سزای بەندکردن و پێبژاردنی دارایی دەدرێت.

En az 10 karakter gerekli