حکوومەتی هەرێم: هیچ بنکەیەکی بیانی لە خاکی هەرێمدا نییە

0

لایک

0

فەرمانگەی پەیوەندییەکانی دەرەوەی حکوومەتی هەرێمی کوردستان-عێراق، لە ڕاگەیەندراوێکی
فەرمیدا نیگەرانیی قووڵی خۆی بەرامبەر ئەو تۆمەتانە دەربڕی کە ئەم دواییە لە
دامەزراوە دادوەری و میدیا فەرمییەکانی کۆماری ئیسلامی ئێران بڵاوکراونەتەوە.
تۆمەتەکان باس لەوە دەکەن کە گوایە هەندێک لەو کەسانەی سزادراون، لە هەرێمی
کوردستان و لەلایەن دەزگا هەواڵگرییەکانی وڵاتانی ترەوە مەشقیان پێکراوە.

حکوومەتی هەرێمی کوردستان-عێراق بە توندی هەموو ئەو تۆمەتانەی ڕەتکردەوە و جەختی کردەوە کە
هیچ بارەگا، ناوەندێکی مەشق یان چالاکیی هەواڵگریی وڵاتانی بیانی لە هەرێمی
کوردستان بوونی نییە. لە ڕاگەیەندراوەکەدا هاتووە کە بەستنەوەی هەرێمی
کوردستان بەم جۆرە بابەتانە بێ بنەمایە و دوورە لە ڕاستییەوە، و تەنیا
ناسەقامگیریی زیاتر بۆ ناوچەکە بەدوای خۆیدا دەهێنێت.

فەرمانگەی پەیوەندییەکانی دەرەوە ئاماژەی بەوە دا کە هەرێمی کوردستان هەمیشە
فاکتەرێکی سەقامگیری و پێکەوەژیان بووە لە عێراق و ناوچەکەدا، و بەپێی
دەستووری عێراق پابەندە بە پرەنسیپی پەیوەندیی باشی دراوسێیەتی. جەختیشی
کردەوە کە ڕێگە نادرێت خاکی هەرێمی کوردستان-عێراق بۆ تێکدانی ئاسایشی وڵاتانی
دراوسێ بەکاربهێنرێت.

لە بەشێکی تری ڕاگەیەندراوەکەدا، حکوومەتی هەرێم داوای لە حکوومەتی فیدراڵیی عێراق
کرد کە بەرپرسیارێتیی دەستووریی خۆی لە پاراستنی سەروەریی وڵات بگرێتە ئەستۆ و
ڕێگری لەو پێشێلکاریانە بکات کە دەکرێنە سەر خاکی هەرێم. هاوکات داوا لە کۆمەڵگەی
نێودەوڵەتی کرا هەوڵەکانیان بۆ کەمکردنەوەی ئاڵۆزییەکان و پاراستنی ئاشتی لە
ناوچەکەدا چڕ بکەنەوە.

لە کۆتاییدا، حکوومەتی هەرێمی کوردستان-عێراق دووپاتی کردەوە کە سەرەڕای هەموو فشار و
قوربانییەکان، بەردەوام دەبێت لەسەر حوکمڕانییەکی بەرپرسیارانە و پاراستنی
هاووڵاتییانی خۆی، و پەرەپێدانی پەیوەندییە بیناکەرەکانی لەگەڵ وڵاتانی دراوسێ
و هاوبەشە نێودەوڵەتییەکان لەسەر بنەمای ڕێزگرتنی هاوبەش.