دەسەڵاتی فڕۆکەوانیی سڤیلی عێراق، درێژکردنەوەی داخستنی تەواوی ئاسمانی عێراقی ڕاگەیاند، ئەمەش هاوکاتە لەگەڵ پەرەسەندنی گرژی و ئاڵۆزییەکانی ناوچەکە.
فەرمانگەکە لە ڕاگەیەندراوێکدا ئاماژەی بەوە کردووە: “بڕیاردرا بە درێژکردنەوەی داخستنی ئاسمانی عێراق بۆ ماوەی (٧٢) کاتژمێر، کە لە کاتژمێر ١٢:٠٠ی نیوەڕۆی ئەمڕۆوە دەستپێدەکات تاوەکو کاتژمێر ١٢:٠٠ی نیوەڕۆی ڕۆژی شەممەی داهاتوو.”
هەروەها ئەوەشی خستووەتەڕوو کە ئەم بڕیارە “لەسەر بنەمای هەڵسەنگاندنی بەردەوامی دۆخی ئەمنی و پەرەسەندنەکانی ناوچەکە” دراوە.
دەسەڵاتی فڕۆکەوانی ئاماژەی بەوەش کردووە، کە بەپێی گۆڕانکارییەکان دووبارە هەڵسەنگاندن بۆ بڕیارەکە دەکرێتەوە و کۆمپانیاکانی فڕۆکەوانی و لایەنە پەیوەندیدارەکان لە هەر نوێکارییەک ئاگادار دەکرێنەوە.
