پارێزگاری هەولێر ڕایدەگەیەنێت، تونێلی پیرمام بە ڕووی بارهەڵگرەکاندا دەکرێتەوە جگە لە رۆژانی هەیینی و بۆنە و پشووەکان.
ئەمڕۆ شەممە، 11-05-2024، ئومێد خۆشناو، پارێزگاری هەولێر لە راگەیەندراوێکدا ئاگاداری شۆفێران و هاووڵاتییانی کردەوە، “لە پێناو بەرژەوەندىی گشتیی، کەمکردنەوەی ئاستەنگى هاتووچۆ و جموجۆڵ و جووڵەی بازرگانی، بڕیاردرا بە کردنەوەی تونێلی پیرمام بە ڕووی بارهەڵگرەکاندا بە پابەندبوونیان بە کێشی ڕێگا پێدراو و بارنەکردنى کێشی زیادە”.
بڕیارەکە، وەکو ئەوەی لە راگەیەندراوەکەدا هاتووە، “تا ئەو کاتەیە کە ڕێگەی گونجاو بۆ (هاتووچۆی بارهەڵگرەکان) دابین دەکرێت. هەروەها لە ڕۆژانی هەینی بۆ ماوەی (24) کاتژمێر ناتوانن بە تونێڵی پیرمام هاتووچۆ بکەن و هەروا لە بۆنە و پشووەکانیشدا بۆیان نییە هاتوچۆی پێدا بکەن “.
پارێزگاری هەولێر داوا لە شوفێرانی بارهەڵگر دەکات لە پێناو پاراستنی گیانی هاووڵاتییان و سەلامەتیی هاتوچۆ و ڕێگاو بانەکان پابەندی ڕێکار و ڕێنماییەکان بن.
پێشتر هاتوچۆی هەولێر رایگەیاندبوو، لەبەر بەرژەوەندیی گشتی و لەپێناو پاراستنی سەلامەتی شۆفێران بڕیار درا بە هاتووچۆکردنی ئۆتۆمبێلی بارهەڵگر بەنێو تونێلی پیرمام بە شێوەی یەکجاری قەدەغە بکرێت.
هاتوچۆی هەولێر هۆکارەکەی بۆ ئەوە گەڕاندبووەوە، گوایە ژمارەیەکی زۆر ئۆتۆمبێلی بارهەڵگر بەو تونێلەدا هاتوچۆیان دەکرد، ئەمەش وای کردبوو هاتوچۆ لە تونێلکەدا سست بێت و ئاستەنگ بۆ هاتوچۆی ئۆتۆمبێلەکانی دیکە دروست ببێت، هەروەها لە ئەگەری پەککەوتنی هەر بارهەڵگرێکیش لە تونێلەکە، ئەوا ڕێگەکە بەتەواوی دادەخرا، کە ڕێگەیەکی گەشتیاری و ئابوورییە.
1
مەرجەکانی وەرگرتن لە کولێژی سەربازی ئاشکرا دەکرێت
2
خشتەی تاقیکردنەوەی نیشتمانی بۆ پۆلی 9ـی بنەرەتی راگەیەندرا
3
وەزارەتی خوێندنی باڵا رێنمایی بۆ خوێندنی دیپلۆمی باڵا، ماستەر و دکتۆرا دەردەکات
4
“ژیانی کەم ئەندامان لە کوردستان یەکسانە بە دۆزەخ”
5
یەکەم تابلۆی ئۆتۆمبێل لەسەر سیستەمی نوێ لە سلێمانی چاپ کرا
