لە بەغداد دەنگی چەند تەقینەوەیەك بیستران

لە بەغداد دەنگی چەند تەقینەوەیەك بیستران

شوبات 9, 2024 10:36
لە بەغداد دەنگی چەند تەقینەوەیەك بیستران
0

لایک

كەمێك پێش ئێستا لە بەغدادی پایتەختی عێراق دەنگی چەند تەقینەوەیەك بیستران، بەگوێرەی زانیاریی سەرچاوەكانیش تەقینەوەكان بۆردوومان بوون و لەلایەن فڕۆكەی بێفڕۆكەوانەوە ئەنجام دراون، حیزبوڵڵای عێراقیش كوژرانی دوو سەركردەیانی لە بۆردوومانەكاندا راگەیاند.

بەگوێرەی زانیارییەكانی میدیا عێراقییەکان، دەنگی سێ تەقینەوە بیستراون، بەگوێرەی دەنگۆكان یەكیان ئۆتۆمبێلێكی سەركردەیەكی حەشدی شەعبی بووە لەناوچەی (بەلەدیات)، كە بەتەواوەتی سووتاوە و تاوەكو ئێستا ناسنامەكەی ئاشكرا نییە.

سەرچاوەکە ئاماژەی بەوەشكرد، بەگوێرەی دەنگۆكان یەكێك لە تەقینەوەكانی دیكە لەناوچەی (ئەلعوبەیدی) بووە و كۆگایەكی چەك و تەقەمەنی كراوەتەئامانج ئەوی دیكەیان لەناوچەی (جەمیلە) بووە، لەئێستادا هێزە ئەمنییەكان ناوچەی بەلەدیاتنیان كۆنترۆڵكردووە و رێگەنادەن كەس نزیكببێتەوە، دەنگۆی بەهێزیش ئەوەیە تەقینەوەكان بۆردوومان بووبێتن و لەرێگەی فڕۆكەی بێفڕۆكەوانەوە بووبێت.

هاوكات ئاژانسی فرانس پرێس بڵاویكردووەتەوە، هێرشەكانی بەغداد بە فڕۆكەی بێفڕۆكەوان بووە و یەكیان لە رێگەی سێ مووشەكەوە ئۆتۆمبێلێكی كردووەتەئامانج.

روونیشیكردووەتەوە، بەگوێرەی سەرچاوەیەكی ئەمنی، ئەو ئۆتۆمبێلەی كراوەتەئامانج، سەركردەیەكی گرووپە چەكدارییەكانی نزیك لە ئێرانی تێدا بووە، لە بۆردوومانەكانیشدا دوو سەركردەی ئەو گرووپانە كوژراون.

ئاژانسی رۆیتەرز لەزاری سەرچاوەیەكی ئەمنییەوە بڵاویكردووەتەوە، بۆردوومانەكە لەلایەن فڕۆكەیەكی بێفڕۆكەوانەوە بووە، ئۆتۆمبێلێكی حەشدی شەعبی لە رۆژهەڵاتی بەغداد كردووەتەئامانج.

هاوكات راگەیاندنى حیزبوڵڵاى عێراقى بڵاویکردەوە، دوو سەرکردەیان لە بۆردوومانەکەدا کوژراون، ئەوانیش ئەبوباقر ساعدی، بەرپرسی سیستمی مووشەکی و ئەرکان عیلیاوی, بەرپرسی سیستمی زانیاریی حیزبوڵڵا بوون.

هاوكات وەزارەتی بەرگریی ئەمریكا (پنتاگۆن) رایگەیاندووە، ئاگاداری هێرشەکانی سەر بەغدادن و بەمزووانە وردەکارییەکەی ئاشکرادەکەن.

En az 10 karakter gerekli