وەزارەتى تەندروستى عێراق وەڵامى سعودیە دەداتەوە

0

لایک

0

وەزارەتى تەندروستى عێراق وەڵامى وەزارەتى تەندروستى سعودیە دەداتەوە کە داواى لە هاوڵاتییانى کردبوو سەردانى عێراق نەکەن بەهۆى خراپى کەرتى تەندروستییەوە و دەڵێت: ساڵانە ملیۆنان گەشتیار سەردانمان دەکات و هیچ نەخۆشییەک ناگرن.

لە بەیاننامەکەى وەزارەتى تەندروستى عێراقدا هاتووە؛ ئاستى خزمەتگوزارییە تەندروستییەکان لە عێراق زۆر بەرزە و دابەزینى بەرچاو لە نەخۆشییە گواستراوە و بەربڵاوەکان تۆمار کراوە، ئەمەش دەگەڕێتەوە بۆ چاودێرى بەرزى تەندروستى.

ئاماژە بۆ ئەوەشکراوە کە بەپێى داتاکانى رێکخراوى تەندروستى جیهانیی ژمارەى گیانلەدەستدان بە نەخۆشییە گواستراوەکان لە عێراق زۆر کەم بووەتەوە بەراورد بە تۆمارە جیهانییەکان.

لەبارەى ڤایرۆسى کۆرۆناوە تەندروستى عێراق دەڵێت: حاڵەتەکانى توشبوون زۆر کەمن و تەنانەت ئەم ڤایرۆسە لە وڵاتە زۆر پێشکەوتوەکانیش تۆمار دەکرێت و لە عێراق هیچ گۆڕاوێکى ئەم نەخۆشییە تۆمار نەکراوە.

ئەوەش ئاماژەى بۆکراوە کە ساڵانە زیاتر لە پێنج ملیۆن گەشیار لە 80 وڵاتى جیهانەوە سەردانى عێراق دەکەن و خزمەتگوزارى تەندروستى پێشکەشى زیاتر لە ملیۆنێکیان دەکرێت و تا ئێستا هیچ نەخۆشییەکى وەک کۆلێرا و تاى قرم و پەتاکانى دیکەیان تێدا تۆمار نەکراوە.

هەروەک جەخت کراوەتەوە کە وەزارەتەکە لەگەڵ نوێنەرى سعودیە لە عێراق گفتوگۆ دەکات و داوا دەکات کە ناوى عێراق لەو لیستە لاببرێت.

ئەم بەیاننامەیەى وەزارەتى تەندروستى لەکاتێکدایە کە دوێنێ وەزارەتى تەندروستى سعودیە لە بەیاننامەیەکدا داواى لە هاوڵاتییان کرد کە سەردانى عێراق و سووریا و سودان نەکەن، بەپێى بەیاننامەکە لەم وڵاتانە نەخۆشییە گواستراوەکان بەربڵاون و خزمەتگوزارییە تەندروستییەکانیشیان لە ئاستى پێویستدا نییە و خراوەتە لیستى ئەو وڵاتانەى کە مەترسییان لەسەر لەرووى تەندرروستییەوە.