وەزارەتی تەندروستی روونکردنەوە لەبارەی دەنگۆی راگرتنی چەند نەشتەرگەرییەک دەدات

0

لایک

0

وەزارەتی تەندروستی هەرێمی کوردستان ڕوونکردنەوە لەبارەی ڕاگرتنی نەشتەرگەریی دەدات و ڕەتی دەکاتەوە و دەڵێت، ڕاگرتنی نەشتەرگەری دوورە لە ڕاستی و تەنیا شێواندنی ڕاستییەکانە بۆ مەرامی چەند بەرژەوەندیخوازێک.

ئەمڕۆ شەممە 30ـی 09ـی 2023 لە ڕوونکردنەوەیەکدا وەزارەتی تەندروستی هەرێمی کوردستان ڕایگەیاند: بەداخەوە چەند پەیجێکی سۆشیال میدیا بابەتێکیان بڵاوکردووەتەوە گوایە وەزارەتی تەندروستی ڕێگرە لە ئەنجامدانی چەند نەشتەرگەرییەک بەبێ ئەوەی بڕیارەکە بخوێننەوە یان ڕای فەرمی وەزارەت وەربگرن.

ڕاشیگەیاند: بۆ ئەم مەبەستە تەواوی ئەو تۆمەت و پڕوپاگەندانە ڕەت دەکەینەوە و ڕایدەگەیەنین کە ڕاگرتنی نەشتەرگەری دوورە لە ڕاستی و تەنیا شێواندنی ڕاستییەکانە بۆ مەرامی چەند بەرژەوەندیخوازێک.

ئەوەشی خستووەتەڕوو کە ڕاستییەکەی بەمەبەستی ڕێگەگرتن لە دیاردەیەکی نایاسایی کە لە چەند نەخۆشخانەیەک و فریاکەوتن سەرپێچی دەکرا لەلایەن چەند کەسێک کە نەخۆش ناچار دەکرا کڕینی پێداویستی نەشتەرگەری و دیاردەی کڕین و فڕۆشتن لەناو نەخۆشخانەی حکوومی لەگەڵ هاووڵاتییان بکەن بەبێ هیچ ڕێکارێک و ڕەزامەندی فەرمی.

هەروەها باسی لەوە کردووە کە وەزارەتی تەندروستی بڕیاری قەدەغەکردنی ئەو سەرپێچیەی داوە و ڕێگە دەگرێت لە بەرژەوەندی کرین و فڕۆشتنی پێداویستی بە نایاسایی کە بێنە ناو نەخۆشخانەی حکوومی و بیفرۆشن بە هاووڵاتییان.

وەزارەتی تەندروستی ئاماژەی بەوەش داوە کە حکوومەتی هەرێمی کوردستان بودجەی تایبەتی مانگانەی تەرخانکردووە و پێویست ناکات نەخۆش خۆی دابینی بکات، لێرەوە وەزارەتی تەندروستی جەخت لە دابینکردنی پێداویستییەکان دەکاتەوە لەسەر ئەرکی حکوومی نەوەک پێشێلکردنی مافی نەخۆش و کڕینی لەلایەن هاووڵاتییانەوە.

لە ڕوونکردنەوەکەدا وەزارەتی تەندروستی جەخت دەکەینەوە لەسەر ئەنجامدانی سەرجەم نەشتەرگەرییەکان لە کەرتی گشتی و نەخۆشخانەی حکوومی. دیاردەی ناچارکردنی نەخۆش و ناردنی بۆ نەخۆشخانەی تایبەتی قەدەغەیە و سەرپێچیکاران ڕووبەڕووی یاسایی دەبنەوە.

وەزارەتی تەندروستی دەقی بڕیارەکەشی خستووەتەڕوو و دەشڵێت: بە پێویستمان زانی بەرچاوڕوونی و دەقی بڕیارەکە بڵاو بکەینەوە بۆ هاووڵاتییان نیشانی بدەین کە هیچ نەشتەرگەرییەک باسی قەدەغە نەکراوە، بەڵکوو ئەو بڕیارە لەدژی بەرژەوەندی کەسانێکە کە سەرپێچی دەکەن بە وەرگرتنی پارە لە هاووڵاتییان و فرۆشتنی پێداویستی ئەنجام دەدەن لەناو نەخۆشخانە لە هەمانکاتدا لە سۆشیال میدیا هەوڵ دەدەن بابەتەکە بشێوێنن بەئاراستەی مەرامی خۆیان ببەن.