مەسرور بارزانی، سەرۆکی حکومەتی هەرێمی کوردستان – عێراق لە بەحرەین لەگەڵ شا، سەرۆکوەزیران، وەزیری دەرەوە و راوێژکاری ئاسایشی نیشتمانیی بەحرەین کۆبووەوە.
رۆژی سێشەممە، 10-12-2024، مەسرور بارزانی، سەرۆکی حکومەتی هەرێمی کوردستان – عێراق لەگەڵ شا حەمەد ئەل خەلیفە، شای بەحرەین، میر سەلمان بن حەمەد ئال خەلیفە، سەرۆکوەزیرانی وڵاتەکە، عەبدوللەتیف بن راشد ئەلزەییانی، وەزیری دەرەوە و شێخ ناسر بن حەمەد ئال خەلیفە، راوێژکاری ئاسایشیی نیشتمانی و فەرماندەی پاسەوانی شاهانەی وڵاتەکە کۆبووەوە.
حکومەتی هەرێمی کوردستان – عێراق ڕایگەیاند، “شای بەحرەین ستایشی پێشکەوتن و ئاوەدانی و دۆخی ئارامی و پێکەوەژیانی هەرێمی بە رێبەرایەتیی ژیر و حەکیمانەی سەرۆک مەسعود بارزانی کرد و ئامادەیی شانشینی بەحرەینی بۆ پشتیوانیکردنی هەرێمی کوردستان – عێراق لە هەموو بوارەکاندا دەربڕی.”
“لە بەرامبەردا سەرۆکی حکومەت سوپاس و پێزانینی هەرێمی کوردستان – عێراقی بۆ پشتیوانیی و هاریکاریی بەحرەین نیشاندا”. لە راگەیێندراوەکەی حکومەتدا هاتووە.
هاوکات بەگوێرەی حکومەتی هەرێم تەوەری سەرەکی کۆبوونەوەکان جەختکردنەوە لە سەر گرنگیی پتەوکردنی پەیوەندییەکان، کردنەوەی کۆنسولخانەی بەحرەین لە هەرێم و دەستپێکردنەوەی گەشتی راستەوخۆی مەنامە – هەولێر بوو.
هەروەها گفتوگۆکردن لەبارەی پرۆژەی رێگەی گەشەپێدان و دوایین پێشهاتەکانی سووریا و ناوچەکە، تەوەرێکی دیکەی کۆبوونەوەکان بوون.
