وەزارەتی پەروەردەی عێراق بریاری كۆتایی لەسەر پشووی قوتابخانەكان بەهۆی بەڕێوەچوونی هەڵبژاردنەكان دا و ڕایگەیاند پشووەكە تەنیا ئەو قوتابخانە دەگرێتەوە كە بنكەی دەنگدانیان تێدایە.
پێشتر كۆمیسیۆنی باڵای سەربەخۆی هەڵبژاردنەكانی عێراق ڕایگەیاندبوو: لەگەڵ وەزارەتی پەروەردە رێككەوتووین لە ڕۆژی هەینی رێكەوتی ٢٠٢٥-١١-٧ قوتابخانەكانیان ڕادەست بكەن وەك ئامادەكارییەك بۆ بەڕێوەچوونی هەڵبژاردنەكان تاكو ڕۆژی چوارشەممە رێكەوتی ٢٠٢٥-١١-١٢.
لەمبارەیەوە ئەمڕۆ سێشەممە وەزارەتی پەروەردەی عێراق لە ڕاگەیەندراوێكدا بڵاوی كردەوە: پشووەكان تەنیا ئەو قوتابخانانە دەگرێتەوە كە بنكەی دەنگدانیان تێیدایە و هەڵبژاردنیان تێدا ئەنجام دەدرێت.
هەروەها بڵاویشی كردەوە: لە سەرجەم قوتابخانەكانی دیكەی حكوومی و ئەهلیدا دەوام ئاسایی و بەردەوام دەبێت و پشووەكە ئەوان ناگرێتەوە.
سەبارەت بە پشووی گشتیش لە سەرجەم دامودەزگاكانی حكوومەت، ئەمڕۆ سێشەممە ئەنجومەنی وەزیرانی عێراق بڕیاری دا تەنیا ڕۆژی بەڕێوەچوونی هەڵبژاردن كە ڕۆژی سێشەممە رێكەوتی ٢٠٢٥-١١-١١ـە پشوو دەبێت.
