سەرۆک وەزیرانی عێراق رایگەیاند، تاوەکو تەمووزی ساڵی داهاتوو سەرجەم مامەڵە داراییەکان لە فەرمانگە حکومییەکانی عێراقدا دەبێت بە ئەلیکترۆنی و کۆتایی بە پارەدانی کاش دەهێنن.
ئەمڕۆ دووشەممە، نووسینەگەی محەمەد شیاع سوودانی سەرۆک وەزیرانی عێراق رایگەیاند، سەرۆک وەزیران چەند بڕیارێكی بۆ پەرەپێدانی سیستم و خزمەتگوزارییەكانی پارەدانی ئەلیكترۆنی دەرکردووە.
سوودانی لە بڕیارەکانیدا داوای کردووە، كار بكرێت بۆ بە بانكیكردنی مووچەی کارمەندانی کەرتی تایبەت هاوشێوەی کەرتی حکومی و هەر یەکە لە وەزارەتی کار و کاروباری کۆمەڵایەتی و بانکی ناوەندیی عێراق، بە بەشداریی ژمارەیەک لە دامەزراوەكانی کەرتی تایبەت، راسپێردراون بۆ ئامادەكردنی میکانیزمێکی گونجاو بۆ ئەو مەبەستە.
باسی لەوەش کردووە، پێویستە وەزارەتەکان و سەرجەم دامودەزگاکانی حکومەت لە مامەڵەکانیاندا دەستبەرداری پارەدانی کاش ببن و پارەدانی ئەلیکترۆنی بەکاربهێنن.
ئەوەشی خستووەتەروو، بەر لە 31ـی کانوونی یەکەمی ئەمساڵ هەموو وەزارەت و دامەزراوە حکومییەکان پلانێکی یەکخراوەوە پێشکەش دەکەن بۆ گۆڕینی شێوازی پارەکان لە کاشەوە بۆ ئەلیکترۆنی و جێبەجێکردنی پلانەکانیش لە مانگی تەمووز کۆتایی دێت.
