رێبەری کۆماری ئیسلامیی ئێران ڕایگەیاند: “پیرۆزبایی لە خەڵکی مەزنی ئێران دەکەم، بەبۆنەی سەرکەوتنمان بەسەر رژێمی زایۆنی.”
رۆژی پێنجشەممە، 26ی حوزەیرانی 2025، عەلی خامنەیی، رێبەری کۆماری ئیسلامیی ئێران پەیامێکی لەدوای جەنگی وڵاتەکە لەگەڵ ئیسرائیل پێشکێش کرد و ڕایگەیاند: “ئەمریکا هیچ دەستکەوتێکی لە هێرشەکانی سەر بنکە ئەتۆمییەکان نەبوو.”
عەلی خامنەیی وتیشی: “رژێمی زایۆنی لەژێر گورزە کاریگەرەکانی ئێمە وێران بوون، خۆیان بیریان لەوە نەکردبووەوە کە گورزێکی وایان بەردەکەوێت.”
عەلی خامنەیی لە درێژەی پەیامەکەی سوپاسی گەلەکەی کرد لەبەرامبەر “یەکگرتووییان” بەرامبەر هێرشەکانی ئیسرائیل و پاڵپشتیکردنی هێزە سەربازییەکانی ئێران.
هەروەها بە وتەی رێبەری کۆماری ئیسلامیی ئێران “دەبێت رژێمی زایۆنی ئەوە بزانێت، دەستدرێژییەکانیان بۆ سەر ئێران باجەکەی قورسە.”
هاوکات لە کۆتایی قسەکانیدا عەلی خامنەیی وتی: “گەلی ئێران پێشانیان دا کە لە کاتی پێویست هەموو بە یەک دەنگ دەدوێن”.
