سەرۆکی هەرێم و سەرۆکی ئەنجوومەنی باڵای دادوەریی عێراق کۆبوونەوە. سەرۆکایەتیی هەرێمی کوردستان دەڵێت، لەسەر گرنگیی جێبەجێكردنی پرۆگرامی كابینەی حكومەتی نوێی عێراق هاوڕا بوون كە رێككەوتنی هەموو لایەن و پێكهاتەكانی لەسەرە.
ئێوارەی ئەمڕۆ چوارشەممە، 08-03-2023، نێچیرڤان بارزانی، سەرۆکی هەرێم لە هەولێر پێشوازی لە فایەق زێدان، سەرۆکی ئەنجوومەنی باڵای دادوەریی عێراق کرد.
بەگوێرەی راگەیەندراوێکی سەرۆکایەتیی هەرێمی کوردستان، لە کۆبوونەوەیەکدا باسیان لە “رۆڵی دادوەری و دادگاكان لەسەر سەقامگیریی وڵات” کردووە کە کاریگەریی لەسەر کایەکانی ژیان هەیە، هەروەها “لەسەر گرنگیی جێبەجێكردنی پرۆگرامی كابینەی حكومەتی فیدراڵی هاوڕا بوون كە رێككەوتنی هەموو لایەن و پێكهاتەكانی لەسەرە.”
نێچیرڤان بارزانی سوپاسی فایەق زێدانی کردووە بۆ “رۆڵ و ئەركیان لە كاری پێكەوەیی و كۆشش بۆ دڵنیاییدان كە دەبێت دادگاكان جێگەی دڵنیایی بن بۆ سەرجەم هاووڵاتییان و پێكهاتەكانی عێراق.”
وەکو لە راگەیەندراوەکەی سەرۆکایەتیی هەرێمدا هاتووە، سەرۆکی ئەنجوومەنی باڵای دادوەریی عێراق “سوپاسی رۆڵ و پێگەی سەرۆك نێچیرڤان بارزانی كرد لە پێكەوەژیان و قووڵكردنەوەی گیانی پێكەوەیی لەسەر ئاستی عێراق بەگشتی.”
هاوکات هەر ئەمڕۆ سەرۆکی حکومەتی هەرێم مەسرور بارزانى، لە شاری هەولێر له‌گه‌ڵ دادوەر فائق زێدان سەرۆکی ئەنجوومەنی باڵای دادوەری عێراق کۆبووەوە.
لە کۆبوونەوەکەدا گفتوگۆ لە بارەی دوایین گۆڕانکاری و پێشهاتەکانی دۆخی گشتیی عێراق و هەنگاوەکانی ئامادەکردنی هەردوو پڕۆژە یاسای دادگای باڵای فیدراڵی و نەوت و گاز کرا.
هەردوولا هاوڕابوون لەسەر ئەوەی دەرفەتێکی ئەرێنی بۆ چارەسەرکردنی کێشەکانی نێوان هەرێمی کوردستان و حکومەتی فیدراڵ لە سەر بنەمای دەستوور هەیە.
1
مەرجەکانی وەرگرتن لە کولێژی سەربازی ئاشکرا دەکرێت
2
خشتەی تاقیکردنەوەی نیشتمانی بۆ پۆلی 9ـی بنەرەتی راگەیەندرا
3
وەزارەتی خوێندنی باڵا رێنمایی بۆ خوێندنی دیپلۆمی باڵا، ماستەر و دکتۆرا دەردەکات
4
“ژیانی کەم ئەندامان لە کوردستان یەکسانە بە دۆزەخ”
5
یەکەم تابلۆی ئۆتۆمبێل لەسەر سیستەمی نوێ لە سلێمانی چاپ کرا
