حەیان عەبدولغەنی وەزیری نەوتی عێراق لە کۆنفرانسێکی رۆژنامەوانیدا رایگەیاند، لە دانوستان و گفتوگۆکان لەگەڵ کۆمپانیاکانی بەرهەمهێنانی نەوتی هەرێمی کوردستان-عێراق بەرەوپێشچوون و لە رێککەوتنی هەناردەکردنەوەی نەوت نزیکبوونەتەوە.
ئاماژەی بەوەشکرد، دەستپێکردنەوەی هەناردەی نەوتی هەرێم پەیوەستە بە دەستپێکردنەوەی بەرهەمهێنان لە کێلگە نەوتییەکانی هەرێمی کوردستان-عێراق، گفتوگۆکانیش وای نیشان دەدەن لە داهاتووییەکی نزیکدا بگەن بە چارەسەر.
پێشتریش کۆمپانیای (DNO)ی نەرویجی رایگەیاند، ئاستی بەرهەمهێنانی نەوتیان بۆ 80 هەزار بەرمیل نەوتی رۆژانە لە کێلگەی نەوتی تاوکێ بەرزکردووەتەوە و پێشبینی دەکرێت بە دەرکەوتنی ئەنجامی دانوستان و گفتوگۆکانی دەستپێکردنەوەی هەناردەی نەوتی هەرێم ئەو ژمارەیە زیاد ببێت.
لە رۆژی 25ی مانگی ئازاری ساڵی رابردوو هەناردەی نەوتی هەرێمی کوردستان-عێراق راگیرا، ئەوەش دوای ئەوەی ژووری ناوبژیوانی نێودەوڵەتی هەناردەی نەوتی هەرێمی لە رێگەی بەندەری جەیهانی تورکیاوە بە نایاسایی ناساند.
