حکومەتی عێراق بڕیار دەدات دەستبەجێ نەوتی هەرێمی کوردستان -عێراق ڕادەستی کۆمپانیای سۆمۆ بکرێت، 16 دۆلاریش بۆ دەرهێنان و گواستنەوەی بەرمیلێک نەوت دیاری دەکات کە گەورەترین بەربەستی بەردەم پرۆسەی هەناردەکردنەوەی نەوت بوو.
ئەمڕۆ سێشەممە لە کۆبوونەوەی هەفتانەی ئەنجوومەنی وەزیرانی عێراق بەسەرۆکایەتیی محەممەد شیاع سوودانی، بڕیار درا دەستبەجێ نەوتی بەرهەمهێنراو لە هەرێمی کوردستان – عێراق ڕادەستی كۆمپانیای بە بازاڕكردنی نەوتی عێراق (سۆمۆ) بكرێت، قەرەبووی تێچووی بەرهەمهێنان و گواستنەوەی نەوتیش لەلایەن وەزارەتی دارایی عێراقەوە بە سولفە بدرێت، بە تێكڕای (16) دۆلار بۆ هەر بەرمیلێك نەوت.
هاوکات: ساڵێک و هەشت مانگە هەناردەی نەوتی هەرێم بۆ دەرەوە ڕاگیراوە، ئەمەش زیاتر لە 20 ملیار دۆلار زیانی بەر ئابووریی عێراق و هەرێمی کوردستان – عێراق گەیاندووە.
