نێچیرڤان بارزانی: هه‌موان له‌ هه‌مان كه‌شتيداین و ئه‌گه‌ر هاوهه‌ڵوێست و يه‌كڕيز باین، دۆخه‌كه‌ به‌ ئه‌مڕۆ نه‌ده‌گه‌يشت
  • TEBA KURDİ
  • عێراق
  • نێچیرڤان بارزانی: هه‌موان له‌ هه‌مان كه‌شتيداین و ئه‌گه‌ر هاوهه‌ڵوێست و يه‌كڕيز باین، دۆخه‌كه‌ به‌ ئه‌مڕۆ نه‌ده‌گه‌يشت

نێچیرڤان بارزانی: هه‌موان له‌ هه‌مان كه‌شتيداین و ئه‌گه‌ر هاوهه‌ڵوێست و يه‌كڕيز باین، دۆخه‌كه‌ به‌ ئه‌مڕۆ نه‌ده‌گه‌يشت

ئازار 20, 2024 17:05
نێچیرڤان بارزانی: هه‌موان له‌ هه‌مان كه‌شتيداین و ئه‌گه‌ر هاوهه‌ڵوێست و يه‌كڕيز باین، دۆخه‌كه‌ به‌ ئه‌مڕۆ نه‌ده‌گه‌يشت
0

لایک

سەرۆكی هەرێمی كوردستان بەبۆنەی هاتنەوەی یادی نەورۆز و سەری ساڵی نوێی كوردییەوە پەیامێك بڵاودەكاتەوە و رایدەگەیەنێت، هەمووان لە هەمان كەشتیداین و ئەگەر هاوهەڵوێست و یەكڕیز باین، دۆخەكە بە ئەمڕۆ نەدەگەیشت.

نێچیرڤان بارزانی، سەرۆكی هەرێمی كوردستان لە پەیامەكەیدا ئاماژەی بەوەكردووە، سوپاسی تێگەیشتن و گیانی بەرپرسیاریەتی و خۆڕاگریی فەرمانبەران و خەڵكی كوردستان دەكەم، لە نزیكەوە ئاگاداری باری ژیان و گوزەرانیانین، چاره‌سه‌ركردنى ئه‌م دۆخه‌كارى له‌پێشينه‌ى هه‌موومان له‌ هه‌موو دامه‌زراوه‌كانى هه‌رێمى كوردستانه‌، دڵنيايان ده‌كه‌مه‌وه‌ كه‌ ئه‌م سه‌ختيانه‌ش تێده‌په‌ڕن و ده‌بنه‌ ڕابردوو.

دەقی پەیامی سەرۆكی هەرێمی كوردستان:
نەورۆز، جەژنی نەتەوەیی و سەری ساڵی تازەی كوردی، بە گەرمی لە خێزان و كەسوكاری سەربەرزی شەهیدان، لە هەر كوردێك و هەموو پێكهاتەكانی گەلی كوردستان لە هەركوێ بن‌، پیرۆز دەكەم. هیوای ساڵێكی تازەی پڕ لە خۆشی و تەندروستیی باش، ئارامی و ئاسوودەیی و سەركەوتن بۆ هەمووان دەخوازم.

ئەمڕۆ كە بە دۆخێكی هەستیاردا تێدەپەڕین، داوا لە لایەنە سیاسییەكانی كوردستان دەكەم، بە گیانی بەرپرسیاریەتیی نیشتمانی و بە لێكگەیشتن، ناكۆكییەكان چارەسەر بكەن تا بتوانین پێكەوە ڕووبەڕووی هەڕەشە و ئاڵنگارییەكان ببینەوە و فیدراڵی و قەوارەی سیاسی و ماف و دەسكەوتە دەستوورییەكانمان بپارێزین. هەمووان لە هەمان كەشتیداین و ئەگەر هاوهەڵوێست و یەكڕیز باین، دۆخەكە بە ئەمڕۆ نەدەگەیشت.

گەلی كوردستان هەرگیز واز لە ئازادی و مافەكانی ناهێنێت. مێژوو سەلماندوویەتی تا نكۆڵی لە كورد و كوردستان بكرێت و مافەكانی پێشێل بكرێت، عێراق خۆشی و سەقامگیری بەخۆیەوە نابینێت. با هەموومان لە عێراق لە هەڵەكانمانەوە فێر ببین. جێبەجێنەكردنی دەستوور و فیدراڵی و ڕێككەوتنە سیاسییەكان، دەستیدەستیكردن بە شایستەكان و هەوڵی بچووككردنەوەی هەرێمی كوردستان و پێشێلكردنی مافە دەستوورییەكانی، جگە لە زیان هیچ سوودێكی بۆ عێراق نابێت.

لەم جەژنە پیرۆزەدا جەخت لە بڕوا و سیاسەتی نەگۆڕمان دەكەینەوە كە هەرێمی كوردستان وەك هەمیشە لە ناوچەكە فاكتەری ئارامی و سەقامگیری دەبێت. خوازیاری پەیوەندیی باش و دۆستانە و دراوسێیەتیی باشە لەسەر بنەمای ڕێز و بەرژەوەندیی هاوبەش. هەر لەم بۆنەیەدا پیرۆزبایی لەو گەلانەش دەكەین كە جەژنی نەورۆز دەگێڕن و ئەم یادە دەكەنەوە.

سوپاسی تێگەیشتن و گیانی بەرپرسیاریەتی و خۆڕاگریی فەرمانبەران و خەڵكی كوردستان دەكەم. لە نزیكەوە ئاگاداری باری ژیان و گوزەرانیانین. چارەسەركردنی ئەم دۆخە، كاری لەپێشینەی هەموومان لە هەموو دامەزراوەكانی هەرێمی كوردستانە. دڵنیایان دەكەمەوە كە ئەم سەختیانەش تێدەپەڕن و دەبنە ڕابردوو. بە ئومێدەوە بەرەو ژیان و داهاتوویەكی باشتر هەنگاو دەنێین و كوردستان بۆ هەمیشە وڵاتی پێكەوەژیان و لێبوردەیی و فرەیی دەمێنێتەوە.

نەورۆز و سەری ساڵی تازەتان پیرۆز،
هەموو ساڵێك بە خۆشی.

نێچیرڤان بارزانی
سەرۆكی هەرێمی كوردستان
2024/3/20

En az 10 karakter gerekli