وەزارەتی تەندروستی راگەیەندراوێکی بڵاوکردەوە

0

لایک

0

دوای زیاتر لە هەفتەیەک وەزارەتی تەندروستی حکومەتی هەرێمی کوردستان-عێراق ڕوونکردنەوەی لەبارەی گیان لەدەستدانی گەنجێک دەدات، کە وا بڵاوکرایەوە بە ژیری دەستکرد گیانی لەدەستداوە.

ئەمڕۆ سێشەممە، 17ـی حوزەیرانی 2025، وەزارەتی تەندروستی حکوومەتی هەرێمی کوردستان-عێراق ڕاگەیاند، دوای بڵاوبوونەوەی هەواڵێك لە سۆشیاڵ میدیا لەماوەی ڕابردوو گوایە هاووڵاتیەك بەهۆی بەكارهێنانی ژیری دەستكرد كۆچی دوایكردووە، وەزارەتی تەندروستی بەدواداچوونی تەواوی بۆ بابەتەكە كرد و زانیاری تەواو لە كەسە نزیكەكانی كۆچكردوو و نەخۆشخانە وەرگرت.

لە ڕاگەیانراوەکەدا هاتووە، وەزارەتی تەندروستی گەیشتە ئەو ڕاستیەی ئەم هەواڵە ڕاست نیە چەندین ڕاگەیاندن و پەیجی سۆشیاڵ میدیا بەبێ گەڕانەوە بۆ لایەنی فەرمی هەواڵەکەیان بڵاوکردووەتەوە.

وەزارەتی تەندروستی دەڵێت، دوو قسە هەیە بۆ بەرژەوەندی گشتیی دەخەینەڕوو.

یەکەم: پێویستە هاوڵاتیان هیچ دەرمانێك یان پێداویستی پزیشکی بەبێ ڕاوێژی پزیشكی چارەسەر و شوێنی فەرمی نەبێت  بەكاری نەهێنن و گوێ لە هیچ ڕیکلامێکی ئۆنڵاین و سۆشیاڵمیدیا نەگرن کە بەبێ مۆڵەت و دەرمانی نایاسایی نابێت بفڕۆشرێتە هاوڵاتیان وە لەڕووی پزیشکیەوە ئامڕازی زیرەکی دەستکرد بەبێ پشکنینی پزیشکی و بینین و ڕاوێژی پزیشکی چارەسەر هەڵەی پزیشکی لێ دەکەوێتەوە.

دووەم: ڕاگەیاندنەکان و پەیجەکانی سۆشیاڵمیدیا پێویستە لەگەڵ لایەنی فەرمی بەدواداچوون بکەن پێش بڵاوکردنەوەی ئەم جۆرە هەواڵانە.