بەیانیی ئەمڕۆ نرخی هەر ئۆنسەیەک زێڕ 31 دۆلار بەرزبووەوە و گەیشتەوە 2 هەزار و 700 دۆلار. مسقاڵێک زێڕی عەیار 21ـیش گەیشتەوە 580 هەزار دینار.
فراوانبوونی زیاتری جەنگی نێوان ئۆکراینا و رووسیا، خواستی لەلایەن وەبەرهێنەرانەوە بۆ زێڕ زیادکردووە، ئەوەش هۆکاری سەرەکیی بەرزبوونەوەی نرخەکەیەتی.
رۆژی دووشەممەی ئەم هەفتەیە لەگەڵ کرانەوەی بازاڕ دا، ئۆنسەیەک زێڕ بە 2,563 دۆلار بوو. هۆکاری دابەزینەکەشی ئەگەری راگرتنی شەڕەکان بوو لە لایەن دۆناڵد ترەمپی سەرۆکی هەڵبژێردراوی ئەمریکا.
لە بەرەبەیانیی دووشەممەی ئەم هەفتەیەوە کاتێک بازاڕەکان کرانەوە، واتە لە 5 رۆژی رابردوودا، نرخی هەر ئۆنسەیەک زێڕ نزیکەی 150 دۆلار بەرزبووەتەوە.
بەپێی سەندیکای زێڕنگرانی هەرێمی کوردستان – عێراق، ئێستا نرخی فرۆشتنی زێڕ بەم شێوەیەیە:
مسقاڵێک زێڕی عەیار 24 بە 663 هەزار دینارە
مسقاڵێک زێڕی عەیار 22 بە 607 هەزار دینارە
مسقاڵێک زێڕی عەیار 21 بە 580 هەزار دینارە
مسقاڵێک زێڕی عەیار 18 بە 497 هەزار دینارە
ئەم نرخەی ئەمڕۆش، بەرزترینە لە دوو هەفتەی رابردوودا.
