بەڕێوەبەرایەتی گشتیی کەشناسی هەرێمی کوردستان-عێراق پێشبینی دەکات ئەمڕۆ و سبەی ئاسمانی هەرێم لە پەڵە و نیمچە هەورەوە بۆ هەوری تەواو بگۆڕێت و ئەگەری نمە باران سەرجەم ناوچەکانی هەرێم بگرێتەوە.
ئەمڕۆ سێشەممە، ١٧ـی شوباتی ٢٠٢٦، بەڕێوەبەرایەتییەکە کەشى پێشبینیکراوى ٤٨ کاتژمێرى داهاتووی بڵاوکردووەتەوە پێشبینی دەکات، ئاسمان ساماڵ و پەڵە هەور بێت، بەڵام لە کاتەکانی ئێوارەدا بۆ هەوری تەواو دەگۆڕێت.
هەر بە گوێرەی پێشبینییەکان، ئەمشەو لە سنووری ئیدارەی زاخۆ نمەباران و بارانی مامناوەند دەسپێدەکات و پاشان کاریگەرییەکەی بۆ سەرجەم ناوچەکانی پارێزگای دهۆک، ناوچە شاخاوییەکانی ئیدارەی راپەڕین، ناوچە شاخاوییەکانی هەولێر(ئەربیل) و سەنتەری شار و پارێزگای سلێمانی درێژ دەبێتەوە، کاریگەرییەکە تاوەکوو بەرە بەیانی سبەی چوارشەممە بەشێوەی نمەباران لە باشووری هەرێم و ناوچەکانی گەرمیان بەردەوام دەبێت.
لەبارەی کەشی پێشبینیکراوی سبەى چوارشەممە ١٨ـی شوباتی ٢٠٢٦، بەڕێوەبەرایەتییەکە ئاماژەیداوە، ئاسمان نیمچە هەور و هەوری تەواو دەبێت، لەگەڵ نمە بارانی پچڕ پچڕ لە بەشێک لە ناوچە شاخاوییەکان و ناوچە سنووریەکان، بەڵام ئەگەری نمە بارانێکی کەم لە سەنتەری پارێزگای سلێمانی و هەولێر(ئەربیل) لە کاتەکانی بەیانی زوودا پێشبینیکراوە، بەڵام دوای نیوەڕۆ ئاسمان بۆ پەڵە هەور و نیمچە هەور دەگۆڕێت .
بەرزترین پلەکانی گەرمای پێشبینیکراو بەم شێوەیە:-
هەولێر(ئەربیل): ٢٣پلە
سڵێمانی: ٢٢پلە
دهۆک: ٢١پلە
زاخۆ: ٢١پلە
چەمچەماڵ: ٢٤پلە
سۆران: ١٩پلە
حاجی ئۆمەران: ١٦پلە
