سه‌رۆكى هه‌رێم لەگەڵ وه‌زيرى ده‌ره‌وه‌ى ئه‌ڵمانيا کۆبووەوە و تاوتوێی په‌يوه‌ندييه‌كانى نێوان هه‌ولێر(ئەربیل) و به‌غدادیان کرد.
ئه‌مڕۆ چوارشه‌ممه 08-03-2023، نێچيرڤان بارزانى، سه‌رۆكى هه‌رێم و فەرماندەی گشتیی هێزە چەکدارەکان لە هەولێر پێشوازى له ئەنالینا بێربۆک، وه‌زيرى ده‌ره‌وه‌ى ئه‌ڵمانيا كرد.
بەگوێرەی راگەیەندراوی سەرۆکایەتیی هه‌رێم، له كۆبوونه‌وه‌يه‌كدا نێچيرڤان بارزانى سوپاسى هاوكارى و پشتگيريى سه‌ربازى و مرۆيى و سياسيى ئه‌ڵمانياى بۆ عێراق و هه‌رێم كرد، هه‌روه‌ها دووپاتیكرده‌وه كه هه‌ڕه‌شه‌كانى تيرۆر هێشتا به‌رده‌وامن، بۆيه عێراق و هه‌رێم پێويستييان به به‌رده‌واميى پشتگيريى ئه‌ڵمانيا و كۆمه‌ڵگه‌ى نێوده‌وڵه‌تى هه‌يه.
لاى خۆيه‌وه، بيربۆک دووپاتیكرده‌وه كه ئه‌ڵمانيا به بايه‌خه‌وه له په‌يوه‌ندييه‌كانی له‌گه‌ڵ عێراق و هه‌رێم و ئارامى و سه‌قامگيريى سياسى و ئابوورييان ده‌ڕوانێت. له‌مباره‌وه ئاماژه‌ى به گرنگيى جێبه‌جێكردنى رێككه‌وتنى حكومه‌تى هه‌رێمى كوردستان و حكومه‌تى فيدراڵيى عێراق بۆ ئاساييكردنه‌وه‌ى دۆخى شنگال كرد كه ده‌بێته هۆى گه‌ڕانه‌وه‌ى ئاواره‌كان و ئاوه‌دانكردنه‌وه‌ى ناوچه‌كه.
په‌يوه‌ندييه‌كانى هه‌ولێر – به‌غداد ته‌وه‌رێكى ديكه‌ى كۆبوونه‌كه بوو، کە تیایدا، نێچيرڤان بارزانى ئاماژه‌ى به هه‌بوونى كه‌شێكى ئه‌رێنيى گفتوگۆى نێوان هه‌ردوولا بۆ چاره‌سه‌ركردنى كێشه‌كان كرد، هه‌روه‌ها ئاماژه‌ى به هاوئاهەنگی پته‌وى نێوان سوپاى عێراق و پێشمه‌رگه بۆ به‌ره‌نگاربوونه‌وه‌ى داعش كرد.
ئەوەش هاتووە، په‌يوه‌ندييه‌كانى عێراق و هه‌رێم له‌گه‌ڵ وڵاتانى دراوسێ، دۆخى ئاواره و په‌نابه‌ران له هه‌رێم ، دۆخى شنگال و ئێزدييان به‌گشتى و چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه بوو. نێچيرڤان بارزانى، سوپاسى ئه‌ڵمانياى كرد بۆ پشتگيرى و هاوكاريكردنى ئێزدييان و ناساندنى كۆمه‌ڵكوژييان به جينۆسايد له په‌رله‌مانى ئه‌ڵمانيا.
1
دابەشكردنی مووچە دەستپێدەكاتەوە
2
کۆنگرەی 14ـی پارتی؛ ناوی ئەندامانی کۆمیتەی ناوەندی راگەیەندرا
3
سەرۆکایەتی هەرێم: نابێت هه‌رێمى كوردستان بكرێته گۆڕهپانى يهكلاییكردنهوهى ململانێكانی لایەنە ناکۆکەکان
4
لیستی هاوپەیمانی تورکمانی: لەناوبردنی سیستەمی کۆتا جێگای قەبوڵ نییە و هەڵوێستی توندمان دەبێت
5
مەسرور بارزانی: پاڵپشتی خۆم بۆ بریندارانی هێرشه مهترسیدارهکەی شاری جەددە رادهگهیهنم
