لەئەنجامی وەرگەڕانی پاسێکی عومرەکاران، لەناوچەی عەقەبەی باکووری شاری عەسیری سعودیە، 20 کەس گیانیان لەدەستدا و 29 کەسی دیکەش برینداربوون.
بەگوێرەی هەواڵێکی ئاژانسی (الحرة)، ئێوارەی رۆژی دووشەممە پاسێکی عومرەکاران لەناوچەی عەقەبە کە بەرەو مەككەی پیرۆز دەڕۆیشت وەرگەڕاوە و بەوهۆیەوە 20 کەس گیانیان لەدەستداوە و 29 کەسی دیکەش برینداربوون، لەکاتی وەرگەڕانیشیدا پاسەکە گڕیگرتووە و سووتاوە.
دوای رووداوەکە پۆلیس و لایەنی ئەمنییەکانی سعودیە و مانگی سووری تەندروستی ئەو وڵاتە گەیشتوونەتە شوێنی رووداوەکە، قوربانیەكانیان بۆ نەخۆشخانەی عەسیری ناوەندی گواستووەتەوە.
تیمەکانی بەرگری شارستانی لە شوێنی رووداوەکە و توانیویانە ئاگرەکە کۆنتڕۆڵ بکەن، بەپێی لێکۆڵینەوە سەرەتاییەکانیش، هۆکاری سەرەکی رووداوەکە بۆ هەبوونی کێشە لە بزوێنەری پاسەکە دەگەڕێتەوە و لەئەنجامیشدا کۆنتڕۆڵی لەدەستداوە و خۆی کێشاوە بەیەکێک لە پردەکانی سەر رێگاکەدا.
