وەزارەتی دارایی هەرێم دەڵێت، دوای ناردنی پارەکەی دوێنێی بەغداد هێشتا 243 ملیار دینار کورتهێنانیان هەیە و لەبەر ئەوە ناتوانن لە ئێستادا مووچەی مانگی ئاب دابەش بکەن.
هونەر جەمال، وتەبێژی وەزارەتی دارایی هەرێمی کوردستان رایگەیاند، دوای ئەوەی دوێنێ وەزارەتی دارایی عێراق بڕی 572 ملیار دیناری خستوەتە سەر هەژماری وەزارەتی دارایی هەرێم و لەگەڵ ئەو بڕەی پێشتر ناردویەتی لە ئێستادا 755 ملیار دیناریان لەبەردەستە.
وتیشی، وەزارەتی دارایی هەرێم بۆ مووچەی هەر مانگێک 998 ملیار دیناری پێویستە و لەبەرئەوە لە ئێستادا بەو 755 ملیار دینارە ناتوانن مووچەی مانگی ئاب دابەش بکەن، چونکە 243 ملیار دینار کورتهێنانیان هەیە.
وتەبێژی وەزارەتی دارایی ئاماژەی بەوەشکرد ئەمڕۆ بە فەرمی داوای روونکردنەوە لە وەزارەتی دارایی عێراق دەکەن و چاوەڕێ دەکەن بەغداد لە نزیکترین کاتدا پارەی تەواوکاری مووچە بنێرێت و لەگەڵ ناردنیشیدا بە بەزوترین کات دەست بەدابەشکردنی مووچەی مانگی هەشت دەکەن.
