هاتووچۆی هەولێر چەند رێنماییەکی نوێ بڵاودەکاتەوە

0

لایک

0

بەڕێوەبەرایەتیی هاتووچۆی هەولێر راگەیەندرادوێکی بڵاوکردەوە و چەند رێنماییەکی نوێی راگەیاند و بەگوێرەی بەشێك لە رێنماییەكانیش، گەڕانەوە بە بەگ و وەستان و چاوەڕێكردن لەرێگاوبانەكان قەدەغەیە و ناشبێت پیادەڕەوەان لەسەر شەقامی خێرا بپەڕنەوە.

ئاماژە بەوەش کراوە، بۆ زیاتر گرەنتیكردنی سەلامەتیی هاووڵاتییان و شۆفێران، چەند ڕێنماییەكی پێویستی لەبارەی بەكارهێنانی ڕێگە خێراكان بۆ شۆفێر و هاووڵاتییان دیاریكردوە و داواش دەكات هەموو لایەكی پێیەوە پابەند بن.

ئەم كارانە لەسەر هێڵە خێراكان قەدەغە كراون:

1. وەستان و چاوەڕێكردن بە بێ هۆكاری لەناكاو.
2. گەڕانەوە بە بەگ بە هەموو شێوەیەك.
3. نابێت پیادەڕۆیان لەسەر شەقامی خێرا بپەڕنەوە، مەگەر پردەكان بەكار ببەن.
4. كڕین و فرۆشتن و مامەڵە لەسەر شەقامە خێراكان.
5. ڕۆیشتنی ئەو سوارڕۆیانەی كە خێراییان لە 60 كیلۆمەتر لە كاتژمێرێكدا كەمترە.
6. ڕۆیشتنی سوارڕۆكانی بیناسازی و كشتوكاڵی وەكو تراكتۆر و دەڕاسە و گرێدەر و شۆڤڵ و تەنانەت بۆ مەودای چەند مەترێكیش، بەڵكو دەبێت بە ئامێری هەڵگرتنی تایبەت بگوازرێنەوە.
7. پێچاوپێچكردن و تەڕناش و كێبڕكێ.
8. بەكارهێنانی مۆبایل و سۆشیالمیدیا.
9. پێچكردنەوە لە شوێنە تایبەتەكانی ئۆتۆمبێلی فریاگوزاریی خێرا یان هەر دەرچەیەكی دیكەی فریاگوزاری.
10. هەڵگرتن و دابەزاندنی سەرنشین.
11. لێدانی فوللایت.
12. لێخوڕینی پایسكیل و مۆپید و سكۆتەر و ماتۆڕی سێتایە.