فەرمانگەی میدیا و زانیاریی حکوومەتی هەرێمی کوردستان لەبارەی پڕۆژەی هەژماری من ڕوونکردنەوەی داوە و دەڵێت، مووچەخۆرانی هەرێمی کوردستان بڕیاردەر و خاوەن دەسەڵاتی تەواون لە خەرجکردنی مووچەکەیان.
فەرمانگەی میدیا و زانیاریی حکوومەتی هەرێمی کوردستان سەبارەت بە چەند لێدوانێک سەبارەت بە پڕۆژەی هەژماری من ڕوونکردنەوەیەکی بڵاو کردۆتەوە.
لە ڕوونکردنەوەکەی فەرمانگەی میدیا و زانیاریی حکوومەتی هەرێمی کوردستان هاتووە، “لە چەند پەیج و دەزگایەکی میدیایی، لێدوانێکی چەواشەکارییانە سەبارەت بە پڕۆژەی هەژماری من، بڵاو کراوەتەوە، کە ئامانج لێی لێدانە لە پرۆژە ستراتیژییەکانی حکوومەتی هەرێمی کوردستان و وەزارەتی دارایی و ئابووری.”
حکوومەتی هەرێم دڵنیایی دەداتە هاووڵاتییان و ئاماژەی بەوە داوە، “ئێمە سەرجەم فەرمانبەران و مووچەخۆرانی هەرێمی کوردستان دڵنیا دەکەینەوە، کە سەرلەبەری ئەو لێدوانانە دوورن لە ڕاستییەوە و فەرمانبەر و مووچەخۆرانی هەرێمی کوردستان بڕیاردەر و خاوەن دەسەڵاتی تەواون لە خەرجکردنی مووچەکەیان و هەر بڕەپارەیەک کە دەچێتە سەر هەژمارە بانکییەکەیان.”
