وەزارەتی گواستنەوەی عێراق رایگەیاند، سبەی دووشەممە یەکەم کاروانی حاجییانی عێراق لە سعودیە دەگەڕێنەوە.
لە راگەیەندراوی وەزارەتی گواستنەوەی عێراق هاتووە، وەزیری گواستنەوەی عێراق داوای لە کۆمپانیای گشتیی هێڵی ئاسمانیی عێراقییە کردووە هەوڵەکانیان بخەنەگەڕ بۆ گەڕاندنەوەی حاجییانی عێراق بەشێوەیەکی رێکوپێک و فڕۆکە نوێیەکانیش لەو ئەرکەدا بەشداربن.
ئاماژە بەوەش دراوە، وەزارەتی گواستنەوەی عێراق ئامادەکاری کردووە بۆ گەڕانەوەی حاجییان لە فڕۆکەخانەکانی سعودیەوە بۆ فڕۆکەخانەکانی عێراق و رۆژی دووشەممە، 3ی تەمموزی 2023ـش یەکەم گەشتی گەڕانەوەیان ئەنجام دەدرێت.
هاوکات ئێوارەی دوێنێ شەممە بەشێک لەو بەرپرسە باڵایانەی عێراق کە چووبوونە حەج گەڕانەوە.
