پارێزگای هەولێر ئامارەکانی جەژنی بڵاوکردەوە

0

لایک

0

پارێزگای هەولێر ئامارەکانی جەژنی قوربانی بڵاوکردەوە و ئاماژە بەوە درا “لە رۆژانی جەژن ( 8 ) ڕووداوی هاتووچۆ ڕوویاندا، لە ئەنجامیاندا ( 8 ) کەس بریندار و ( 1 ) کەسیش بەداخەوە گیانی لەدەستدا”.

دەقی راگەیەندراوەکە:

بەپێی ئەو ئامادەکاری و پلانانەی بۆ ڕۆژانی جەژنی قوربانى پیرۆز، بە سەرپەرشتی بەڕێز پارێزگاری هەولێر، لە لایەن لیژنەى ئەمنى پارێزگای هەولێر بە مەبەستی پاراستنی ئارامی و ئاسایش شار و سەر و ماڵ و سەلامەتی گیانی هاوڵاتیانی سنووری پارێزگاکەمان ئامادەکاری بۆ کرابوو، پلانەکە وەکوخۆی و بە سەرکەوتووی و بەبێ گیر و گرفت جێبەجێکرا.

ئاماری گشتیی ژمارەى هاتنى گەشتیار و ڕووداوەکانی ڕۆژانی جەژنی قوربانى پیرۆزیش، لە سنووری پارێزگاکەمان بەمشێوەیەی خوارەوە بووە:-

یەکەم/ گەشتوگوزار:

بۆ ڕۆژانی جەژنی قوربانى پیرۆز، پلانی گەشتوگوزار، کە لە لایەن بەڕێوەبەرایەتى گشتیى گەشت و گوزار ئامادەکرابوو، وەک چۆن داڕێژرابوو تەواوی بڕگەکانی وەکو خۆی و بە سەرکەوتووی جێبەجێکران، وەک دانانی لیژنەی تایبەت بۆ دابین کردنی خزمەتگوزاریی پێویست بۆ گەشتیاران لە بازگەکان و پێدانی ڕێنمایی پێویست بە گەشتیاران لە دەروازەکانی شار و پێکھێنانی لێژنەی تایبەت بۆ بە دواداچوون لە ڕەوشی گەشتیاران لە بنکە گەشتیارییەکان بە مەبەستی دڵنیابوون لە پێشکەشکردنی خزمتگوزاریی، ئەوەجگە لە ئاگادارکردنەوەی سەرجەم ڕێستوڕانت و جێشتخانەکان و پێدانی ڕێنمایی بۆ کردنەوە و پیشوازیکردنیان لە گەشتیاران لە رۆژانی جەژن. ژمارەی ئەو گەشیارانەشی لەوماوەیەدا سەردانی هەولێر پایتەختیان کردووە بریتی بوو لە ( 143 هەزار و 921 ) سەد و چل و سێ هەزار و نۆسەد و بیست و یەک گەشتیار.

دووەم/ ئاسایشی هەولێر:-

بەپێی ئەو پلان و ئامادەکاریانەی لەلایەن بەڕێوەبەرایەتی ئاسایشی هەولێر داڕێژرابوو، وەکو خۆی و بەبێ هیچ گیر و گرفتێک جێبەجێکرا و بۆ هەرحاڵەتێکی پێویستیش، هێزەکانی ئاسایش لە ئەرک دابوون.

سێیەم/ پۆلیس:-

سەبارەت بە پلانی بەڕێوەبەرایەتی پۆلیسى هەولێر، بە بەشداری سەرجەم هێزەکان لە هەموو بەش و هۆبەکانی بەڕێوەبەرایەتی پۆلیسى هەولێر لە هەر چوار ڕۆژی جەژنی قوربانى پیرۆز، وەک چۆن داڕێژرابوو تەواوی بڕگەکانی وەکو خۆی و بە سەرکەوتووی جێبەجێکران، ئاماری تاوانەکانیش لە ڕۆژانی جەژن بەمشێوەیەی بوو، ( 35 ) تاوان تۆمارکراوە، ( 26 ) تاوان ئاشکراکراوە، ( 9 ) تاوانیش لە ژێرلێکۆڵینەوە دایە.

چوارەم/ هاتووچۆ:-

سەبارەت بەپلانی بەڕێوەبەرایەتی هاتووچۆی هەولێر بۆ ڕۆژانی جەژنی قوربانى پیرۆز، وەک چۆن داڕێژرابوو تەواوی بڕگەکانی وەکو خۆی و بە سەرکەوتووی جێبەجێکران، بەڵام بەداخەوە بەهۆی پابەندنەبوونی شوفێران بە ڕێنمایی و یاساکانی هاتووچۆ و لێخوڕینی خێرا، ( 8 ) ڕووداوی هاتووچۆ ڕوویاندا، لە ئەنجامیاندا ( 8 ) کەس بریندار و ( 1 ) کەسیش بەداخەوە گیانی لەدەستدا.

پێنجەم/ بەرگری شارستانی:-

تەواوی بنکەکانی بەڕێوبەرایەتی بەرگری شارستانی هەولێر بۆ ڕۆژانی جەژنی قوربانى پیرۆز لە ئەرک دابوون، لەوماویەشدا ( 9 ) حاڵەتی ئاگرکەوتنەوە و ( 1 ) ڕووداوى خنکان و ( 2 ) حاڵەتى ڕزگار کردن هەبووە.

شەشەم:- تەندروستى:

سەبارەت بەپلانی بەڕێوەبەرایەتی گشتیى تەندروستى هەولێر بۆ ڕۆژانی جەژنی قوربانى پیرۆز، تەواوی بڕگەکانی وەکو خۆی و بە سەرکەوتووی جێبەجێکران، لەو ماوەیەشدا کۆى گشتیى سەرجەم ئەو نەخۆشانەى سەردانى نەخۆشخانەکانیان کردووە ( 5,515 ) نەخۆش بووە، ( 6 ) حاڵەتى سووتان و ( 226 ) حاڵەتى ڕووداوى جۆراو جۆر و ( 1 ) منداڵ بوون و ( 425 ) نەشتەرگەرى بچووک و ( 1 ) حاڵەتى تووشبوون بە نەخۆشى پەتاى خوێن بەربوون هەبووە.

حەوتەم/ سەرۆکایەتى شارەوانى هەولێر:-

تەواوی بڕگەکانی پلانی سەرۆکایەتى شارەوانى هەولێر بۆ ڕۆژانی جەژنی قوربانى پیرۆز وەکو خۆی و بە سەرکەوتووی جێبەجێکران، لە ڕۆژانى جەژن ( 35 ) شوێن ئامادەکرابوون بۆ کۆکردنەوەی پاشماوەی ئاژەڵی قوربانی، تەنها لە ڕۆژانى جەژنیشدا بڕی ( 560 ) تۆن پاشماوەی ئاژەڵی قوربانی و ( 6000 ) تۆن زبڵ و پاشماوەى دیکەى هاوڵاتییان لەلایەن کرێکارانى ژینگە پارێزى کۆکرایەوە و لە زبڵخانەی کانی قڕژاڵە چارەسەر کرا.

هەشتەم/ گۆشتگەى هاوچەرخى هەولێر:-

لە گۆشتگەى هاوچەرخى هەولێر و بەبۆنەى جەژنى قوربانى پیرۆز تەنها لە ڕۆژانى جەژن( 1,872 ) ئاژەڵ کراوەتە قوربانى کە ( 513 ) یان ئاژەڵى گەورە و ( 1,359 )شیان ئاژەڵى بچووک بوونە.

وێڕای دەستخۆشیمان لە تەواوى قائیمقامیەت و ناحییەکانى سنوورى پارێزگاکەمان و سەرجەم هێزە ئەمنیەکان و ئاسایشى بازگەکان و فەرمانگە خزمەتگوزارییەکان بۆ بەجێگەیاندنی ئەرکەکانیان لە ڕۆژانی جەژنی قوربانى پیرۆز، جارێکی تر هاوڵاتییانی خۆشەویستی هەولێر دڵنییا دەکەینەوە، وەک هەمیشە لە خزمەتی ئێوەدا دەبین و بەهەموو توانایەکمانەوە بە پشت بەستن بە توانا و چاووکراوەیی هێزە ئەمنیەکانی ناوخۆ، شەو ڕۆژ دەخەینە سەریەک بۆ پاراستنی ئارامی و ئاسایش شار و سەروماڵ و سەلامەتی گیانی هاوڵاتییانی سنووری پارێزگاکەمان.