کۆبوونەوەی پەرلەمان دەستیپێکرد

0

لایک

0

کۆبوونەوەی پەرلەمانی کوردستانی عێراق دوای ٣ مانگ ئەمڕۆ دەستی بە کۆبوونەوەکانی کردەوە و بەرنامەی کاری پەرلەمان بە چڕی ئامادەکراوە و بڕیار وایە سامان بەرزنجی، وەزیری تەندروستی حکومەتی هەرێم ئامادەی دانیشتنەکە دەبێت.

بەر لە دەستپێکردنی کۆبوونەوەکە، هەریەکە لە فراکسیۆنەکانی پارتی دیموکراتی کوردستان و یەکێتی نیشتمانی کوردستان و بزوتنەوەی گۆڕان کۆبوونەوەیەکی تایبەتیان ئەنجامدا لەپێناو زیاتر هەمانەگی و هاوئاهەنگیی بۆ قۆناغی داهاتوو و هەروەها ئەو پرۆژەیاسایانە کە بڕیار وایە لە داهاتوویەکی نزیکدا دەهێندرێتە پەرلەمان.

پێشتر ماڵپەڕی پەرلەمانی کوردستان-عێراق بڵاوی کردەوە کە کارنامەی دانیشتنەکەی ئەمڕۆی پەرلەمان تایبەت دەبێت بە دەنگدان لەسەر پێشنیازەیاسای بەڕێوەبردن و پاراستنی ئاو لە ھەرێمی کوردستان.

ھەروەھا خوێندنەوەی یەکەم بۆ پێشینازەیاسای ئەرک و مافەکانی ھێزکاری تەندروستی لە ھەرێمی کوردستان، ھەروەھا پڕۆژەیاسای وەزارەتی شارەوانی و گەشتوگوزاری ھەرێمی کوردستان و پڕۆژەیاسای دەستەی متمانەبەخشین بە دامەزراوەکان و پڕۆگرامەکانی پەروەردە و خوێندنی باڵا لە ھەرێمی کوردستان دەکرێت.

باسی لەوەش کردووە کە لە میانی دانیشتنەکەدا، هەروەها خوێندنەوەی دووەم بۆ ژمارەیەک پێشنیازەیاسا دەکرێت لەوانە پێشنیازەیاسای بەرکارکردن و ھەمواری یاسای گرتنی مایەی قاچاغ و قەدەغەکراو بۆ ئاڵوگۆڕکردن لە بازاڕە ناخۆییەکان، پێشنیازەیاسای ھەمواری جێبەجێکردنی یاسای چاودێریی نەوجەوانان.

راشیگەیاندووە کە لە میانی دانیشتنەکەدا، راپۆرتی لێژنەی کاروباری تەندروستیی و ژینگە و مافی بەکاربەر سەبارەت بە دەرمانی بێ کوالیتی و ماوەبەسەرچوو، هەروەها قاچاغ و نرخی نەخۆشخانە تایبەتەکان، بە ئامادەبوونی وەزیری تەندروستی بۆ گفتوگۆکردن دەخرێتەڕوو.