سەلمان بن عەبدولعەزیز، پادشای سعوودیە بە فەرمانێکی شاهانە محەمەد بن سەلمانی شازادەی جێنیشینی وەک سەرۆکوەزیرانی نوێی وڵاتەکەی دیاریکرد، کە پێشوتر پادشای وڵات ئەرکەکانی سەرۆکایەتی حکومەت و دەسەڵاتی جێبەجێکردنیشی رادەپەڕاند.
ماڵپەڕی هەواڵی فەرمی سعودیە دەقی فەرمانێکی پادشای وڵاتەکەی بڵاوکردەوە و لە بڕیارەکەدا هاتوە، محەمەد بن سەلمان، شازادەی جێنیشینی سعودیە سەرەڕای ئەرکەکەی ئێستای، وەک سەرۆکی ئەنجومەنی وەزیرانیش دەستبەکاردەبێت.
بەگوێرەی سیستمی حکومڕانی سعوودیە، پادشا لە هەمان کاتدا سەرۆک وەزیرانی وڵاتیشە و ئەندامانی ئەنجومەنی وەزیران هاوکاری دەکەن لە جێبەجێکردنی سیاسەتی ناوخۆیی و دەرەکی.
محەمەد بن سەلمانی تەمەن 37 ساڵ، لە ساڵی 2017ەوە شازادەی جێنیشین و جێگری سەرۆکوەزیرانی سعوودیەیە، هەروەها وەزیری بەرگری و سەرۆکی ئەنجومەنی سیاسی و ئەمنی وڵاتەکەشە.
بەگوێرەی بڕیارەکەی پادشای سعوودیە، خالید بن سەلمانی برای محەمەد بن سەلمان وەک وەزیری بەرگری، یوسف بنیان وەک وەزیری خوێندنی باڵا و تەڵاڵ عەتبی وەک یاریدەدەری وەزیری بەرگری سعوودیە دیاریکراون.
