راگه‌یاندنی پارێزگای هه‌ولێر(ئەربیل) ده‌ڵێت، لە دوو شوێنى زۆر باش دەستدەکرێت بە دروستكردنى یەکەکانى نیشتەجێبوونى کرێنشینان و كەمدەرامەتان کە دەکەوێتە نێوان شەقامى 120 مەترى و 150 مەترى.
ئه‌مڕۆ چوارشه‌ممه 21ـی كانوونی یه‌كه‌می 2022، راگه‌یاندنی پارێزگای هه‌ولێر بڵاویكردووه‌ته‌وه، دوابەدواى فەرمانی مەسرور بارزانی، سەرۆكی حكومەتی هەرێمی كوردستان، لەبارەى دروستکردنی یەكەی نیشتەجێبوون بۆ كرێنشینان و كەمدەرامەتان، بە سەرپەرشتی ئومێد خۆشناو، پارێزگاری هەولێر و ئامادەبوونى هەریەک لەهێمن قادر و مەسعود کارەش، جێگرانى پارێزگار، یاریدەدەرى پارێزگار، قائیمقامى ناوەند، به‌رێوه‌به‌ری گشتیی وه‌به‌رهێنانی هه‌ولێر، سەرۆکى شارەوانى هەولێر، بەرێوەبەری گشتى شارەوانیەکان، به‌رێوه‌به‌ری نه‌خشه‌دانان و ئاوه‌دانی هه‌ولێر و به‌رێوه‌به‌ری گشتیی رێگاوبانی هه‌ولێر، کۆبوونەوەیەک ئەنجامدرا.
له راگه‌یه‌ندراوه‌كه‌دا هاتووه: لەسەرەتاى کۆبوونەوەکەدا، دواى پێداچوونەوە بە بڕیار و ڕاسپاردەکانى کۆبوونەوەى پێشوو و دابینکردنى ئەرز و وردەکاری هونەریی و دیزاین و چۆنیەتى دروستکردن و دەستپێکردنى پرۆژەکە لەلایەن سەرۆکایەتى شارەوانى و به‌رێوه‌به‌رایەتی نه‌خشه‌دانان و ئاوه‌دانی هه‌ولێر، پارێزگاری هەولێر، وێڕاى ئەوەى جه‌ختی لە جێبەجێکردنی فەرمان و ڕاسپاردەى سه‌رۆكی حكومه‌تی هه‌رێمی كوردستان كرده‌وه لەبارەى دروستکردنی یەكەکانی نیشتەجێبوون بۆ كرێنشین و كەمدەرامەتان، بڕیاریدا دەست بە دروستکردنى پڕۆژەکە بکرێت لە ڕێگەی باشترین وەبەرهێنەرانی کوردستان، بە باشترین و چاکترین کوالێتى و شێواز، لە دوو شوێنى زۆر باشى شارى هەولێر، کە دەکەوێتە نێوان شەقامى 120 مەترى و 150 مەترى.
ئه‌وه‌ش خراوه‌ته‌ڕوو، لەتەوەرێکى ترى کۆبوونەوەکەدا، لیژنەیەکى تایبەت پێکهێندرا بۆ دەستکردن بە هەڵاواردن و جیاكردنەوەی ناوى ئەو (59 هەزار) هاوڵاتییەى کە فۆڕمى داواکاری وەرگرتنى یەکەکانیان پڕکردووه‌تەوە و پاشان دەستبکرێت بە تیروپشکى داواکارییەکان بۆ وەرگرتنی شه‌ش هەزار یەکەى نیشتەجێبوون، کە دەبێت ئەو ناوانەى یەکەکانیان بۆ دەردەچێت 100% شایستەبن و هەموو ئەو مەرجانەى کە دانراون لەسەیان جێبەجێبکرێت و پرۆسەکەش بەشەفافی و دادپەروەرى و دوور لەواستە و واستەکارى بەڕێوەبچێت.
شایەنی باسە، مەسرور بارزانی، سەرۆكی حكومەتی هەرێم، لە سەرەتاى مانگى شه‌شی ئەمساڵ له‌پێناو نەهێڵانى گرفتى نیشتەجێبوون و خۆشگوزه‌رانی هاوڵاتیانی کرێنشین و هەژار و كه‌مده‌رامه‌تان، بڕیاریدا بە دروستکردنى 20 هەزار یەکەى نیشتەجێبوونى لە سەرتاسەرى هەرێمى کوردستان، کە 6 هەزارى یەکەیان بەر پارێزگاى هەولێر دەکەوێت.
1
مەرجەکانی وەرگرتن لە کولێژی سەربازی ئاشکرا دەکرێت
2
خشتەی تاقیکردنەوەی نیشتمانی بۆ پۆلی 9ـی بنەرەتی راگەیەندرا
3
وەزارەتی خوێندنی باڵا رێنمایی بۆ خوێندنی دیپلۆمی باڵا، ماستەر و دکتۆرا دەردەکات
4
“ژیانی کەم ئەندامان لە کوردستان یەکسانە بە دۆزەخ”
5
یەکەم تابلۆی ئۆتۆمبێل لەسەر سیستەمی نوێ لە سلێمانی چاپ کرا
