بێگەرد تاڵەبانی، وەزیری کشتوکاڵ رایگەیاند، “بڕیارمانداوە بە کڕینەوەی گەنمی جووتیاران لە دەرەوەی پرۆسەی وەرگرتنی گەنم لە سایلۆکانی هەرێمی کوردستان”.
ئەمڕۆ پێنجشەممە 19-05-2022 ، بێگەرد تاڵەبانی لە فەیسبووکی خۆی رایگەیاند، نرخی هەر تۆنێک لەو گەنمەی وەریدەگرن بە 850 هەزار دینار دەبێت کە ئەمەش هەمان نرخی سایلۆکانی عێراقە.
ئاماژەی بەوەشکرد، وەرگرتنی گەنمەکە بەپێی کوالیتی و ستانداردی وەزارەتی بازرگانیی عێراق دەبێت.
بێگەرد تاڵەبانی راشیگەیاند، جووتیاران دەتوانن لەدوای پشکنین و وەرگرتنی گەنمەکانیان پارەی شایستەی دارایی خۆیان راستەوخۆ وەربگرن.
پڕۆسەی وەرگرتن لە سایلۆکان لە 01-06-2022 لەلایەن هەردوو کۆمپانیای خۆشناو و قەیوان، سەرپەرشتیاری پڕۆژەی بەبازاڕکردنی گەنم دەستپێدەکات و جووتیارانی هەرێم دەتوانن گەنمەکانیان رادەست بکەن و ماوەی رادەستکردن (44) رۆژ دەخایێنێت و تاوەکو 2022/7/14 کۆتاییدێت.
