وەزیری داد و کونسوڵی گشتی تورکیا لە هەولێر تاوتوێی بارودۆخی خاوەنکارانی تورکیا لە هەرێم دەکەن

0

لایک

0

فەرسەت ئەحمەد، وەزیری دادی حکومەتی هەرێمی کوردستانی عێراق پێشوازیی لە هاکان کاراچای، کونسوڵی گشتی تورکیا لە هەولێر(ئەربیل) کرد و باس لەو بڕیارانەی دادگا کرا کە گەیشتوونەتە فەرمانگەکانی جێبەجێکردنی سەر بە وەزارەتی داد و پەیوەندییان بە هاووڵاتیان و خاوەنکارانی تورکیاوە هەیە.

لەوبارەیەوە ماڵپەری حکومەتی هەرێمی کوردستان ئاماژەی بە کۆبوونەوەکە داوە و دەڵێت، “وەزیری دادی حکومەتی هەرێمی کوردستان، دووپاتی لەوە کردەوە کە جێبەجێکردنی داد و دادپەروەریی بۆ هاووڵاتیانی هەرێمی کوردستان و هاووڵاتیانی وڵاتانی بیانی کە لە هەرێم میوانن یان کار دەکەن، ئەرکی سەرشانی ئێمەیە، وەکو وەزیری داد و وەزارەتی داد”.

هاوکات لە راگەیەندراوەکەی ماڵەڕی حکومەت هاتووە، “فەرسەت ئەحمەد، وەزیری داد، سەرنجی کونسوڵی گشتی تورکیای بۆ گلەیی و تێبینی ئەو هاووڵاتیانە ڕاکێشا، کە لە ڕێگەی دەروازەی سنووریی «ئیبراهیم خەلیل»ەوە، سەردانی تورکیا دەکەن، بە تایبەتی هەندێک جار بۆ ماوەی 5 تا 7 کاتژمێر چاوەڕێ دەکەن ئینجا لەلایەنی تورکیاوە دەست بە ڕاییکردنی مامەڵەکانیان دەکرێت، وەزیری داد، داوای لە کونسوڵی گشتی تورکیا کرد، پێویستە ئەوە لەبەرچاو بگیرێت لەناو ئەو هاووڵاتیانەدا، ژن و منداڵ و کەسانی نەخۆش و پەککەوتە هەیە و پێویستیان بە بایەخپێدانێکی تایبەت هەیە و نابێت چەندین کاتژمێر، رابگیرێن”.

لە کۆتایی راگەیەندراوەکەدا ئەوەش هاتووە، “لەلای خۆیەوە، هاکان کاراچای، کونسوڵی گشتی کۆماری تورکیا لە هەرێمی کوردستان، سوپاسی وەزیری دادی حکومەتی هەرێمی کوردستانی کرد و گفتی ئەوەیدا کە لەگەڵ، بەرپرسانی حکومەتی تورکیا قسە دەکات و، ئامانجی ئەوانیش، سەلامەتی و باش ڕاییبوونی گەشت و سەردانی ئەو هاووڵاتیانەی هەرێمی کوردستانە کە سەردانی تورکیا دەکەن، چ لە دەروازەی سنووری و چ لەناو تورکیاش”.