وەزارەتی خوێندنی باڵا: کورسی بەخۆڕایی بۆ وارسى شەهیدان تەرخان دەکرێت
  • TEBA KURDİ
  • عێراق
  • وەزارەتی خوێندنی باڵا: کورسی بەخۆڕایی بۆ وارسى شەهیدان تەرخان دەکرێت

وەزارەتی خوێندنی باڵا: کورسی بەخۆڕایی بۆ وارسى شەهیدان تەرخان دەکرێت

كانونی دووه‌م 31, 2023 20:42
وەزارەتی خوێندنی باڵا: کورسی بەخۆڕایی بۆ وارسى شەهیدان تەرخان دەکرێت
0

لایک

لەسەر پێشنیازى وەزارەتى خوێندنى باڵا و توێژینەوەى زانستى ماوەى سێ ساڵە لە هەر بەشێک لە زانکۆ و پەیمانگە تایبەتەکان و خوێندنى پارالێل و ئێواران لە زانکۆ حکومییەکان، پێنج کورسى بەخۆڕایى بۆ وارسى شەهیدان و ئەنفالکراوان تەرخان دەکرێت، ئەوانەشى لە سەرووى ئەم پێنج کورسییە وەردەگیرێن بەپێى رێنمایى وەزارەتى شەهیدان کرێى خوێندنیان بۆ خەرج دەکرێت، بۆ ئەمساڵیش لەسەر پێشنیازى وەزیرى خوێندنى باڵا بڕیارى دابینکردنى پێنج کورسى خوێندن بە خۆڕایى بۆ هەر بەشێک بەردەوام دەبێت.

د. ئارام محمد قادر، وەزیرى خوێندنى باڵاو توێژینەوەى زانستى، ئەمڕۆ چوارشەممە 21-09-2022، لە دیوانى وەزارەت پێشوازی کرد لە عەبدولا حاجى محمود، وەزیرى کاروبارى شەهیدان و ئەنفالکراوان و شاندی یاوەرى.

لە دیدارێکدا کە بریکارى وەزارەت و راوێژکار و بەڕێوەبەرانى گشتى ئامادەی بوون، گفتوگۆ کرا لەبارەى رێنمایى تایبەت بە خزمەتگوزارى خوێندن و تەندروستى کەسوکارى شەهیدان و ئەنفالکراوان و ئەو خزمەت و پرۆژە هاوبەشانەى هەردوو وەزارەت بە هاریکارى یەکتر پێشکەشى کەسوکارى شەهیدان و ئەنفالکراوانى دەکەن لە هەرێم.

لە دەستپێکدا، وەزیرى خوێندنى باڵا و توێژینەوەى زانستى کورتە باسێکى سەبارەت بەو ماف و ئەرکانەى وەزارەت خستەڕوو کە بۆ وارسى شەهیدان و ئەنفالکراوان لە هەرێم پێشکەشى دەکات، ئەویش لەپێناو لەبەرچاوگرتنى خەبات و تێکۆشانى شەهیدان و ئەنفالکراوان کە گیانى خۆیان بەخت کرد لە پێناو ئازادى و سەرفرازى بۆ گەلەکەمان، لەمبارەیەوە وتی، “لە خوێندنى بەرایى/ بەکالۆریۆس و دبلۆم، خوێندنى باڵا/ دبلۆمى باڵا، ماستەر و دکتۆرا و خوێندنى تایبەت، بەڕەچاوکردنى تایبەتمەندییەتى هەوڵمانداوە زۆرترین ئاسانکارى و خزمەت پێشکەش بە وارسى شەهیدان بکەین و دەرفەت و هەلى خوێندنیان بۆ دەستەبەر بکەین”.

لە بەرامبەردا وەزیرى کاروبارى شەهیدان و ئەنفالکراوان، لە وتەیەکدا تیشکى خستە سەر رێنمایى تایبەت بە خزمەتگوزارى خوێندن و تەندروستى کەسوکارى شەهیدان و ئەنفالکراوان بە مەبەستى زیاتر بایەخدان بە کەسوکارى شەهیدان لەگشت بوار و سێکتەرەکاندا، بۆ کەرتى خوێندنى بەخۆڕایی ئاماژەى بە هەماهەنگى بەردەوامى هەردوو وەزارەت کرد و دووپاتی کردەوە و جەختی لەوەکردەوە، “هاوکارى و هەماهەنگییە بەردەوامەکانى هەردوولا دەمانگەیەنێتە ئەو ئامانجەى کارى لەپێناودا دەکەین”.