ئەمڕۆ دووشەممە دووبارە نرخی بەرمیلێک نەوتی خاوی برێنت 82 سەنت بەرزبوونەوەی بەخۆوە بینی و گەیشتە 113 دۆلار و 37 سەنت.
شایەنی باسە نرخی بەرمیلێک نەوتی خاوی تێکساسی ئەمریکاش 69 سەنت بەرزبوونەوەی بەخۆوە بینی و گەیشتە 110 دۆلار و 97 سەنت.
چەند پێوەرێک هەن بۆ بەرزبوونەوەی نرخی نەوت کە سەرەکیترینیان ئەو جەنگەی نێوان رووسیا و ئۆکراینایە و بووەتە هۆی هەڵبەز و دابەز لە نرخی نەوت بە شێوەیەکی گشتی.
فاکتەرێکی دیکە هەیە و دەبێتە هۆی بەرزبونەوەی نرخی نەوت کە ئەویش بۆ خواست و بەکارهێنانی سووتەمەنیە لە ئەمریکا، چونکە خستنەڕووی کەم و دابەزینی رێژەی بەهای دۆلار راستەوخۆ کاریگەریی هەیە لەسەر نرخی نەوت.
هەروەها بازاڕی بەنزین بەرزبوونەوەی بەخۆوە بینیوە بەهۆی دەستپێکی وەرزی پشووی هاوینە و ئەوەش یەکێکە لەو هۆکارانە کە دەبێتە فاکتەریکی گرنگ بۆ بەرزبوونەوەی نرخی نەوت لە بازاڕەکانی جیهاندا.
