“بکوژی دوو مامۆستاکە پێشتر پێشینەی یاسایی لەسەر بووە”
  • TEBA KURDİ
  • عێراق
  • “بکوژی دوو مامۆستاکە پێشتر پێشینەی یاسایی لەسەر بووە”

“بکوژی دوو مامۆستاکە پێشتر پێشینەی یاسایی لەسەر بووە”

كانونی دووه‌م 31, 2023 20:43
“بکوژی دوو مامۆستاکە پێشتر پێشینەی یاسایی لەسەر بووە”
0

لایک

پارێزگاری هەولێر رایدەگەیەنێت، ئەو کەسەی ئەمڕۆ دوو مامۆستاکەی کوشتووە، پێشتر پێشینەی یاسایی لەسەر بووە.

ئومێد خۆشناو، پارێزگاری هەولێر راگەیەندراوێکی لەبارەی کوژرانی دوو مامۆستای زانکۆی سەلاحەدین لە هەولێر بڵاوکردەوە و رایگەیاند، “سەر لەبەیانی ئەمڕۆ بەداخەوە بە هەواڵێكی جەرگبڕ تاساین، كاتێك قوتابیەك لە زانكۆی سۆران كە پێشتر پێشینەی یاسایی لەسەر بووە، بە ناڕەوایی هەڵیكوتایە سەر ماڵی دكتۆر (ئیدریس حەمە خان) لەو كاتەی ناوبراو بە تەنها لە ماڵ بووە، بە چەند فیشەكێك د. ئیدریسی شەهید كردووە، دواتر بەوەندەش نەوەستاوە رووی لە كۆلێژی یاسا كردووە و بە هەمان هەناسەی تاوانكاری تەقە لە د. كاوان ئیسماعیل راگری كۆلێژی یاسای زانكۆی سەلاحەددین كردووە و دوای گواستنەوەی بۆ ژووری نەشتەگەری بە داخەوە ئەویش گیانی لە دەستداوە، هاوكات پاسەوانێكی كۆلێژەكەش لەو رووداوە بریندار بووە. كە ئێستا دۆخی جێگیرە”.

پارێزگاری هەولێر ئاماژەی بەوەشکردووە، “بۆ ئەم مەبەستە هەر زوو هێزەكانی ئاسایش و پۆلیس راسپێردران بۆ دەستگیركردنی تاوانبارەكە و لە ماوەیەكی پێوانەییدا تۆمەتبارەكە دەستگیركراو پەراوی لێكۆڵینەوەی بۆ كرایەوە بە مەبەستی وەرگرتنی سزای موستەحەقی تاوانی قێزەونی خۆی”.

لەو راگەیەندراوەدا پارێزگاری هەولێر، راشیگەیاندووە، “ئـێمە وەك پارێزگای هەولێر وێڕای هاوخەمی خۆمان بۆ خانەوادەی هەردوو شەهیدی ناوبراو كە سەرمایەیەكی ئەكادیمی و زانستی شارەكەمان بوون، سەرەخۆشی لە هاووڵاتیانی شارەكەمان دەكەین، هاوكات هاووڵاتیانی پارێزگای هەولێر دڵنیا دەكەینەوە، كە هیچ كەسێك لەسەرووی یاساوە نییە و هەر تاوانبارێك بە ئەندازەی تاوانكاری خۆی سزای یاسایی وەردەگرێ. لە كۆتایدا سوپاس بۆ هێزەكانی ئاسایش و پۆلیس كە توانیان لە ماوەیەكی كورتدا تۆمەتبار دەسگیر بكەن”.