ئەمریکا: ئێران سەروەریی خاکی عێراقی بنپێکردووە
  • TEBA KURDİ
  • عێراق
  • ئەمریکا: ئێران سەروەریی خاکی عێراقی بنپێکردووە

ئەمریکا: ئێران سەروەریی خاکی عێراقی بنپێکردووە

كانونی دووه‌م 31, 2023 20:40
ئەمریکا: ئێران سەروەریی خاکی عێراقی بنپێکردووە
0

لایک

ئەمریکا “بەتووندی” سەرکۆنەی هێرشە مووشەکی و درۆنییەکەی ئێران بۆ سەر خاکی هەرێم دەکات کە بووە هۆی گیانلەدەستدانی دوو کەس و داوا دەکات ئێران هێرشەکانی بۆ سەر هەرێم رابگرێت.

بەرەبەیانی ئەمڕۆ سێشەممە، 15ـی تشرینی یەکەمی 2022 بەکاتی هەولێر، نێد پرایس، وتەبێژی وەزارەتی دەرەوەی ئەمریکا لە راگەیەندراوێکدا وتی، “بەتووندی سەرکۆنەی هێرشە بەردەوامە مووشەکی و درۆنییەکانی ئێران لە دژی هەرێمی کوردستانی عێراق دەکەین.”

نێد پرایس ئاماژەی بەوەشکردووە کە ئێران بەشێوەیەکی بەردەوام و “بێشەرمانە” سەروەریی خاکی عێراقی بنپێکردووە و داوای کرد وڵاتەکە هێرشەکانی بۆ سەر خاکی هەرێم و عێراق بوەستێنێت و خۆی لە “هەڕەشەی زیاتر لە دژی یەکپارچەیی خاکی عێراق” بەدووربگرێت.

لە بەشێکی دیکەی راگەیەندراوەکەیدا، وەزارەتی دەرەوەی ئەمریکا پاڵپشتیی ئەمریکا بۆ هەولێر و بەغداد دووپاتدەکاتەوە و دەڵێت، “ویلایەتە یەکگرتووەکان لەگەڵ هاوبەشەکانمان لە بەغدا و هەولێر دەوەستێتەوە و هاوبەشی لە ئامانجی حکومەتی عێراقدا دەکات بۆ پاراستنی ئاسایش، سەقامگیری و سەروەریی خاکی عێراق.”

ئەمە لە کاتێکدایە دوێنێ دووشەممە، سوپای پاسدارانی ئێران لە ڕێگەی 10 مووشەک و درۆنی بۆمبڕێژکراوەوە بارەگای حیزبەکانی ئێرانی لە هەرێم کردە ئامانج و بەهۆیەوە 2 کەس گیانیان لەدەستدا و 8 کەس بریندار بوون.