بە فەرمانی رێکخراوی تاڵیبان، ئافرەتانی پێشکەشکار و پەیامنێری کەناڵە تەلەفزیۆنییەکان لە ئەفغانستان رۆژی یەکشەممە بە پۆشینی پەچەوە چوونە پەخشەوە.
رۆژێک پێشتر، بەشێک لە پێشکەشکار و بێژەری کەناڵەکانی ئەفغانستان بۆ بەرهەڵستیکردن، سەرپێچی فەرمانەکەی تاڵیبانیان کردبوو پەچەیان نەپۆشیبوو، بەڵام وەک خۆیان دەڵێن خاوەنکارەکانیان کەوتوونەتە ژێر فشارەوە و ناچاریان کردوون بە باڵاپۆشییەوە بچنە سەر شاشە.
پێشتر تاڵیبان فەرمانی باڵاپۆشی بۆ ئافرەتان دەرکرد، بەپێی فەرمانەکە دەبێت هەموو ژنان لە شوێنە گشتییەکان و لەکاتی چوونە دەرەوە پەچە بپۆشن، بەپێچەوانەوە ڕوبەڕووی سزا دەبنەوە.
سۆنیا نیازی، پێشکەشکاری بەرنامەی TOLOnews بە ئاژانسی هەواڵی فرانس پرێسی راگەیاندووە، ئێمە لەدژی بووین و نامانەوێت ماسک ببەستین.
بەڵام ئاماژەی بەوەشکردووە، کەناڵەکە فشاریان لەسەر بووە و پێی وتوون، کە دەبێت پێشکەشکارە ئافرەتەکان بگوازرێنەوە بۆ کارەکانی دیکە یان لەکارەکانیان دووربخرێنەوە ئەگەر پابەند نەبوون.
خپۆلواک سەپایی، جێگری بەڕێوەبەری كەناڵەكە لە پۆستێكیدا لە تۆڕی كۆمەڵایەتی فەیسبووك رایگەیاند، “ئەمڕۆ لە خەمێكی قوڵداین”.
